ന്യൂഡല്ഹി : ലാവലിന് കേസ് സുപ്രീംകോടതി ഇന്ന് പരിഗണിക്കും. ജസ്റ്റിസ് യു യു ലളിതിന്റെ അധ്യക്ഷതയിലുള്ള ബെഞ്ചാണ് കേസ് പരിഗണിക്കുന്നത്. പിണറായി വിജയന് അടക്കമുള്ളവരെ വെറുതെ വിട്ട കേരള ഹൈക്കോടതി വിധിക്കെതിരെ സിബിഐ നല്കിയ അപ്പീലും, കേസില് നിന്ന് കുറ്റവിമുക്തരാക്കണമെന്ന് ആവശ്യപ്പെട്ട് സമര്പ്പിച്ച മൂന്ന് ഹര്ജികളുമാണ് കോടതി പരിഗണിക്കുന്നത്.
ലാവലിന് അഴിമതി കേസില് മുഖ്യമന്ത്രി പിണറായി വിജയന് ഉള്പ്പെടെയുള്ളവരെ പ്രതിപ്പട്ടികയില് നിന്ന് ഒഴിവാക്കിയതിനെതിരെയാണ് സിബിഐ ഹര്ജി നല്കിയത്. പിണറായി വിജയന് അടക്കമുള്ളവരെ രണ്ട് കോടതികള് വെറുതെ വിട്ടതാണെന്നും അതിനാല് കേസില് ശക്തമായ വാദവുമായി വേണം സിബിഐ വരാനെന്നും ഒക്ടോബര് എട്ടിന് കേസ് പരിഗണിച്ചപ്പോള് സുപ്രീം കോടതി വ്യക്തമാക്കിയിരുന്നു.
തുടര്ന്ന് കൂടുതല് തെളിവുകള് ഹാജരാക്കുന്നതിന് രണ്ടാഴ്ച സാവകാശം വേണമെന്ന് സിബിഐ കോടതിയെ അറിയിക്കുകയായിരുന്നു. ഇത് പരിഗണിച്ച് സുപ്രീം കോടതി കേസ് മാറ്റുകയായിരുന്നു. പിണറായി വിജയന്, കെ.മോഹന് ചന്ദ്രന്, എ. ഫ്രാന്സിസ് എന്നിവരെ കേരള ഹൈക്കോടതി ലാവലിന് കേസില് നിന്ന് കുറ്റവിമുക്തരാക്കിയിരുന്നു. അതേസയം ഉദ്യോഗസ്ഥരായിരുന്ന കസ്തൂരി രങ്ക അയ്യര്, ആര്.ശിവദാസന്, കെ.ജി.രാജശേഖരന് എന്നിവര് വിചാരണ നേരിടണമെന്നും ഹൈക്കോടതി വിധിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ