ആരോഗ്യപ്രവർത്തകരോടെ മാപ്പു പറഞ്ഞ് പൂന്തുറ നിവാസികൾ. കാറുകളിൽ വരുന്ന ആരോഗ്യപ്രവർത്തകരെ പുഷ്പവൃഷ്ടി നടത്തിയാണ് പൂന്തുറ സ്വീകരിച്ചത്. കഴിഞ്ഞ ദിവസമുണ്ടായ ആക്രമങ്ങൾ തെറ്റായ പ്രവണതയാണെന്ന് മനസിലാക്കിയാണ് ആരോഗ്യപ്രവർത്തകരോട് ക്ഷമാപണം നടത്തിയത്. വീടിനു മുകളിൽ നിന്നും വഴിയരികിൽ നിന്നുമാണ് നാട്ടുകാർ പുഷ്പവൃഷ്ടി നടത്തിയത്.
പൂന്തുറ ഇടവക വികാരിയും വാർഡ് കൗൺസിലറുമെല്ലാം ഒന്നിച്ചെത്തിയാണ് ആരോഗ്യപ്രവർത്തകരെ സ്വീകരിച്ചത്. രോഗത്തെ ചെറുക്കാൻ ആരോഗ്യപ്രവർത്തകരുടെ കൂടെയുണ്ടാകുമെന്നും ഇത്തരത്തിലുള്ള സംഭവങ്ങൾ ആവർത്തിക്കില്ലെന്നും അവർ വ്യക്തമാക്കി. സ്വീകരണത്തിന്റെ വിഡിയോ സോഷ്യൽ മീഡിയയിൽ വൈറലാവുകയാണ്. നടൻ ഹരീഷ് പേരടി ഉൾപ്പടെയുള്ള നിരവധി പേരാണ് വിഡിയോ ഷെയർ ചെയ്തിരിക്കുന്നത്. പൂന്തുറയ്ക്ക് അഭിവാദ്യങ്ങൾ എന്നു പറഞ്ഞാണ് ഹരീഷ് വിഡിയോ പങ്കുവെച്ചത്.
വെള്ളിയാഴ്ചയാണ് പൂന്തുറ നിവാസികൾ നിയന്ത്രണങ്ങൾക്കെതിരെ രംഗത്തെത്തിയത്. ലോക്ക്ഡൗൺ നിയന്ത്രണങ്ങൾ ലംഘിച്ച് നൂറു കണക്കിന് പേരാണ് തെരുവിലിറങ്ങിയത്. രോഗികളുടെ എണ്ണം പെരുപ്പിച്ച് കാണിക്കുകയാണ് എന്ന രീതിയിലുള്ള ആരോപണങ്ങൾ അവർ ഉന്നയിച്ചിരുന്നു. കൂടാതെ ആരോഗ്യപ്രവർത്തകരെ കയ്യേറ്റം ചെയ്യാനുള്ള നീക്കവുമുണ്ടായി. കാറിൻ്റെ ചില്ല് നിർബന്ധിച്ച് താഴ്ത്തിച്ച് ഒരു വിഭാഗം കാറിനുള്ളിലേക്ക് ചുമക്കുകയും തുടർന്ന് ഡോക്ടർമാർ ഉൾപ്പടെയുള്ളവർക്ക് ക്വാറന്റീനിൽ പ്രവേശിക്കേണ്ടതായി വന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
