കുരങ്ങനെ വരിഞ്ഞ് മുറുക്കി മലമ്പാമ്പ്, മനുഷ്യര്‍ മാറി നിന്നപ്പോഴും രക്ഷിക്കാന്‍ മറ്റ് കുരങ്ങുകളുടെ പോരാട്ടം

അതിരപ്പിള്ളി: മലമ്പാമ്പിന്റെ പിടിയിൽ പെട്ട കുരങ്ങിനെ മോചിപ്പിക്കാൻ മറ്റ് കുരങ്ങുകളുടെ ശ്രമം. എന്നാൽ കുരങ്ങനെ മലമ്പാമ്പ് വിഴുങ്ങുന്നത് തടയാനായില്ല. 

ആനമല പാതയോരത്തു കണ്ണൻകുഴിക്കു സമീപമാണ് ദയനീയ കാഴ്ച. ബുധനാഴ്ച ഉച്ചയോടെയാണ് പ്ലാന്റേഷൻ എണ്ണപ്പന തോട്ടത്തിൽ പാമ്പ് ആൺകുരങ്ങിനെ പിടികൂടിയത്. മറ്റു കുരങ്ങുകളുടെ കൂട്ടനിലവിളി കേട്ട് എത്തിയ പ്ലാന്റേഷൻ തൊഴിലാളികൾ കുരങ്ങനെ രക്ഷപ്പെടുത്താൻ ശ്രമിച്ചു.

എന്നാൽ പാമ്പ് ചീറിയടുത്തതോടെ തൊഴിലാളികൾക്കും പിന്മാറേണ്ടി വന്നു. ഈ സമയവും മലമ്പാമ്പിന്റെ പിടി വിടീക്കാൻ മറ്റു കുരങ്ങുകൾ ശ്രമം തുടർന്നു. മരച്ചില്ലകൾ ഒടിച്ചെറിഞ്ഞു രക്ഷിക്കാനും ഇവർ ശ്രമം നടത്തിയെങ്കിലും ഒടുവിൽ പാമ്പ് കുരങ്ങിനെ വിഴുങ്ങി.