കോട്ടയം: വൈദ്യുതികമ്പി പൊട്ടിവീണ് ഒരു കുടുംബത്തിലെ അഞ്ചു പേർക്ക് ഷോക്കേറ്റു. ഏറ്റുമാനൂർ പേരൂർ റോഡിൽ തച്ചകുന്നേൽ കരോട്ട് ടിഎൻ സുധീർ (45), മക്കളായ സിദ്ധാർത്ഥ് (18), ആദിത് (15), അർജുൻ (13), സഹോദരീപുത്രൻ രഞ്ജിത് എന്നിവർക്കാണു ഷോക്കേറ്റത്.
പരിക്കേറ്റ ഇവർ തെള്ളകത്തെ സ്വകാര്യ ആശുപത്രിയിൽ ചികിത്സയിലാണ്. ബുധനാഴ്ച രാത്രിയോടെയായിരുന്നു അപകടം. സുധീറിന്റെ വീട്ടിലേക്കു കയറുന്ന പടിയിലാണ് റോഡിൽ പൊട്ടിവീണ വൈദ്യുതികമ്പി കിടന്നിരുന്നത്. സുധീറിനാണ് ആദ്യം വൈദ്യുതാഘാതമേറ്റത്. കമ്പി വീണു കിടക്കുന്നത് അറിയാതെ എത്തി പടിയിൽ ചവിട്ടിയ സുധീർ വൈദ്യുതാഘാതമേറ്റു വീണു.
സുധീർ വീണതു കണ്ട് പിടിച്ചെഴുന്നേൽപ്പിക്കാൻ ഓടിയെത്തിയ മക്കളായ സിദ്ധാർത്ഥ്, ആദിത്, അർജുൻ എന്നിവർക്കും വൈദ്യുതാഘാതമേൽക്കുകയായിരുന്നു. ഓടിക്കൂടിയ ബന്ധുക്കളും അയൽവാസികളും തടിക്കഷണങ്ങൾ ഉപയോഗിച്ച് കമ്പി ഉയർത്തി മാറ്റി. പിന്നാലെ സുധീറിനെയും മറ്റുള്ളവരെയും ആശുപത്രിയിൽ എത്തിച്ചു.
സുധീറിനേയും മക്കളേയും രക്ഷിക്കാൻ ശ്രമിക്കുന്നതിന് ഇടയിലാണ് സഹോദരിപുത്രനായ രഞ്ജിത്തിനും ഷോക്കേറ്റത്. വഴിവിളക്കിനായി വൈദ്യുതി പ്രവഹിക്കുന്ന കമ്പിയാണ് പൊട്ടിവീണ് അപകടം സൃഷ്ടിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ