തൊടുപുഴ: ആ കമന്റിടുമ്പോള്‍ തന്റെ ആഗ്രഹം സാധ്യമാകുമെന്ന് സ്വപ്‌നത്തില്‍ പോലും ധന്യ സോജന്‍ എന്ന 20കാരി ചിന്തിച്ചില്ല. എന്നാല്‍ എന്താണോ താന്‍ ആഗ്രഹിച്ചത് അത് ധന്യയെ തേടിയെത്തി. ഹൃദയ ധമനികള്‍ ചുരുങ്ങുന്ന അപൂര്‍വ രോഗം ബാധിച്ച ധന്യയും അങ്ങനെ ക്യാമറയ്ക്ക് മുന്‍പിലേക്ക്, മണവാട്ടിയായി...
എനിക്കും ഇതുപോലെ ഫോട്ടോഷൂട്ട് മോഡലായാല്‍ കൊള്ളാമെന്നുണ്ട്. നിങ്ങളുടെ ആഭരണങ്ങളെല്ലാം ധരിച്ച് പരസ്യ ചിത്രത്തില്‍ അഭിനയിക്കാന്‍ എനിക്കൊരു അവസരം തരുമോ എന്ന കമന്റാണ് മലബാര്‍ ഗോള്‍ഡിന്റെ ഇന്‍സ്റ്റഗ്രാമില്‍ പരസ്യ വീഡിയോയ്ക്ക് ലഭിച്ചത്. പിന്നാലെ ധന്യയെ തേടി മലബാര്‍ ഗോള്‍ഡിന്റെ വിളിയെത്തി.
മറ്റ് മോഡലുകള്‍ക്കൊപ്പം ഷൂട്ടിങ്ങില്‍ ധന്യയും. എറണാകുളത്ത് വെച്ചായിരുന്നു ഷൂട്ടിങ്. ധന്യയുടെ യാത്രയെ കുറിച്ച് പറയുന്ന രോഹന്‍ മാത്യു സംവിധാനം ചെയ്ത വീഡിയോ ബോളിവുഡ് താരം കരീന കപൂറും സമൂഹമാധ്യമങ്ങളിലൂടെ പങ്കുവെച്ചു. ഇതോടെ ധന്യക്ക് ഇരട്ടി മധുരം.
10 ലക്ഷത്തോളം പേര്‍ ഇതുവരെ ധന്യയുടെ വീഡിയോ കണ്ടു. 2019ല്‍ പ്ലസ് ടുവിന് ശേഷം കാനഡയിലേക്ക് തുടര്‍ പഠനത്തിനായി പോകുമ്പോള്‍ നൂറ് സ്വപ്‌നങ്ങളായിരുന്നു ധന്യയുടെ മനസില്‍. എന്നാല്‍ മൂന്നാം സെമസ്റ്റര്‍ ആയപ്പോള്‍ ഹൃദയത്തിലെ തകരാര്‍ കണ്ടെത്തി.
ഹൃദയത്തിന്റെ പമ്പിംഗ് കപ്പാസിറ്റി 20 ശതമാനത്തിലേക്ക് ചുരുങ്ങുന്ന കണ്‍ജസ്റ്റീവ് ഹാര്‍ട്ട് ഡിസോഡര്‍ എന്ന രോഗമാണ് ധന്യക്ക്. ഒന്നര വര്‍ഷത്തെ ചികിത്സയോടെ ആരോഗ്യനിലയില്‍ വലിയ പുരോഗതി കണ്ടെത്താനായി. ഹൃദയത്തിന്റെ പമ്പിംഗ് കപ്പാസിറ്റി 38ലേക്ക് എത്തിയെങ്കിലും 50 ശതമാനത്തിലേക്ക് കൊണ്ടുവരാനാവണം. അതല്ലെങ്കില്‍ ഹൃദയ മാറ്റ ശസ്ത്രക്രിയ വേണ്ടിവരും.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
