മനാമ: ബഹ്‌റിന്‍ കൊറോണ വൈറസ് ബാധിച്ച് ചികിത്സയിലായിരുന്ന സ്ത്രീ മരിച്ചു. ഗള്‍ഫിലെ ആദ്യ കോവിഡ് മരണമാണിത്. 65 വയസുള്ള സ്ത്രീയാണ് മരിച്ചത്. നേരത്തെതന്നെ ഇവര്‍ക്ക് മറ്റ് ആരോഗ്യ പ്രശ്‌നങ്ങളുണ്ടായിരുന്നതായി ആരോഗ്യ മന്ത്രാലയം അറിയിച്ചു.
കഴിഞ്ഞ മാസം ഇറാനില്‍ നിന്ന് എത്തിയതാണ് ഇവര്‍. വിമാനത്താവളത്തില്‍ നടത്തിയ പരിശോധനയില്‍ രോഗം സ്ഥിരീകരിച്ച ഇവരെ ഐസൊലേഷനിലേക്ക് മാറ്റിയിരുന്നു.
ഏഴ് സ്ത്രീകളും എട്ടുപുരുഷന്‍മാരും ഉള്‍പ്പെടെ 17 പേര്‍കൂടി സുഖം പ്രാപിച്ചതോടെ രോഗമുക്തി നേടിയവരുടെ എണ്ണം 77 ആയി. നിലവില്‍ 143 പേരാണ് രാജ്യത്ത് ചികിത്സയില്‍ കഴിയുന്നത്. ഇവരില്‍ ഒരാളൊഴികെ ബാക്കി എല്ലാവരുടെയും ആരോഗ്യനില തൃപ്തികരമാണെന്ന് ആരോഗ്യ മന്ത്രാലയം അറിയിച്ചു.
കഴിഞ്ഞ രണ്ടാഴ്ചയ്ക്കിടെ ഇറ്റലി, ദക്ഷിണ കൊറിയ, ഈജിപ്ത്, ലെബനന്‍ എന്നിവിടങ്ങളില്‍ നിന്ന് വന്ന എല്ലാവരും വീടുകളില്‍ പ്രത്യേക മുറികളില്‍ താമസിക്കണമെന്ന് ആരോഗ്യമന്ത്രാലയം അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
