ദുബൈ: യുഎഇയില്‍ 2025-ല്‍ ഇ-സ്‌കൂട്ടര്‍ അപകടങ്ങള്‍ ഇരട്ടിയായി വര്‍ധിച്ചതോടെ കടുത്ത നിയന്ത്രണങ്ങള്‍ പ്രഖ്യാപിച്ച് യുഎഇ ആഭ്യന്തര മന്ത്രാലയം. ഗുരുതരമായ ഇ-സ്‌കൂട്ടര്‍ അപകടങ്ങള്‍ 2024-ലെ 61-ല്‍ നിന്ന് 2025-ല്‍ 120 ആയി ഉയര്‍ന്നു, 97 ശതമാനം വര്‍ധന.
2027 ജനുവരി 1 മുതല്‍ പുതിയ ഫെഡറല്‍ ട്രാഫിക് നിയന്ത്രണങ്ങള്‍ പ്രാബല്യത്തില്‍ വരുന്നതോടെ, ഇ-സ്‌കൂട്ടര്‍ ഉപയോഗിക്കുന്നവര്‍ക്ക് കര്‍ശനമായ നിബന്ധനകള്‍ ബാധകമാകും. കുറഞ്ഞ പ്രായപരിധി, പെര്‍മിറ്റുകള്‍, രജിസ്‌ട്രേഷന്‍, സുരക്ഷാ ഉപകരണങ്ങള്‍, വാഹനം ഓടിക്കാന്‍ അനുവദിച്ചിട്ടുള്ള സ്ഥലങ്ങള്‍ എന്നിവയെല്ലാം ഇതില്‍ ഉള്‍പ്പെടുന്നു. അശ്രദ്ധമായ ഡ്രൈവിങ്, പ്രായപൂര്‍ത്തിയാകാത്തവരുടെ ഉപയോഗം, കാല്‍നടയാത്രക്കാര്‍ക്കും മറ്റ് വാഹനങ്ങള്‍ക്കും ഉണ്ടാകുന്ന സുരക്ഷാ ഭീഷണികള്‍ എന്നിവ കണക്കിലെടുത്താണ് നടപടി.
ഇലക്ട്രിക് സ്‌കൂട്ടറുകള്‍, ഇലക്ട്രിക് സൈക്കിളുകള്‍, ചെറിയ മോട്ടോറൈസ്ഡ് ബൈക്കുകള്‍ എന്നിവ ഓടിക്കുന്നതിനുള്ള പെര്‍മിറ്റിന് അപേക്ഷിക്കാന്‍ കുറഞ്ഞത് 15 വയസ്സ് പൂര്‍ത്തിയായിരിക്കണം. ഈ പെര്‍മിറ്റുകള്‍ക്ക് മൂന്ന് വര്‍ഷത്തെ കാലാവധിയുണ്ടാകും, പിന്നീട് പുതുക്കാവുന്നതുമാണ്.
ദുബൈയില്‍ നിലവിലുള്ള ഇ-സ്‌കൂട്ടര്‍ നിയമങ്ങള്‍ പ്രകാരം കുറഞ്ഞ പ്രായപരിധി 16 വയസ്സാണ്. അതിനാല്‍, ഇക്കാര്യത്തില്‍ എന്തെങ്കിലും മാറ്റങ്ങള്‍ വ്യക്തമാക്കുന്നത് വരെ, നിലവിലുള്ള പ്രാദേശിക നിയമങ്ങള്‍ തന്നെ പാലിക്കാന്‍ ഉപയോക്താക്കള്‍ ശ്രദ്ധിക്കണം.
രാത്രിയില്‍ ദൃശ്യപരത ഉറപ്പാക്കാന്‍ മുന്‍വശത്ത് ലൈറ്റുകള്‍.
ബ്രേക്ക് ചെയ്യുമ്പോള്‍ തെളിയുന്ന, പിന്‍വശത്തെ ചുവന്ന ലൈറ്റുകള്‍.
ശബ്ദമുണ്ടാക്കി മുന്നറിയിപ്പ് നല്‍കാനുള്ള സംവിധാനങ്ങള്‍.
കുറഞ്ഞത് പിന്‍ചക്രത്തിലെങ്കിലും ഘടിപ്പിച്ച ബ്രേക്കുകള്‍.
സുരക്ഷിതമായി ഘടിപ്പിച്ച, റോഡ് ഉപയോഗത്തിന് അനുയോജ്യമായ ടയറുകളും മറ്റ് ഭാഗങ്ങളും.
ലൈസന്‍സിങ് അല്ലെങ്കില്‍ ട്രാഫിക് അധികൃതര്‍ അനുവദിച്ചിട്ടുള്ള പാതകളില്‍ മാത്രമേ വാഹനം ഓടിക്കാന്‍ പാടുള്ളൂ.
മോട്ടോര്‍ വാഹനങ്ങള്‍ക്കായി നീക്കിവെച്ചിട്ടുള്ള റോഡുകളില്‍ മറ്റ് വാഹനങ്ങള്‍ ഉപയോഗിക്കാന്‍ പാടില്ല. കൂടാതെ, നിശ്ചയിച്ചിട്ടുള്ള വേഗത പരിധികളും ട്രാഫിക് നിര്‍ദ്ദേശങ്ങളും പാലിക്കാന്‍ ഉപയോക്താക്കള്‍ ബാധ്യസ്ഥരാണ്. വാണിജ്യാടിസ്ഥാനത്തില്‍ വാടകയ്ക്ക് നല്‍കുന്ന വാഹനങ്ങള്‍ക്കും ഈ നിബന്ധനകള്‍ ബാധകമാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates