സംസ്ഥാനത്ത് ദുരിതപ്പെയ്ത്തില്‍ മരണം ഉയരുന്നു. മഴക്കെടുതിയില്‍ ഇതുവരെ 8 പേര്‍ മരിച്ചതായാണ് റിപ്പോര്‍ട്ട്. കശുവണ്ടി അഴിമതിക്കേസിൽ കോർപ്പറേഷൻ മുൻ എംഡി കെ എ രതീഷിന്റെ രാജി മുഖ്യമന്ത്രി ആവശ്യപ്പെട്ടതായി സൂചന. കോമണ്‍വെല്‍ത്ത് ഗെയിംസ് വനിതാ ബോക്‌സിങില്‍ ഇന്ത്യക്ക് ഇരട്ട സ്വർണം. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം.

സംസ്ഥാനത്ത് ദുരിതപ്പെയ്ത്തില്‍ മരണം ഉയരുന്നു. മഴക്കെടുതിയില്‍ കേരളത്തില്‍ ഇതുവരെ 8 പേര്‍ മരിച്ചതായാണ് റിപ്പോര്‍ട്ട്. കോട്ടയത്തും ഇടുക്കിയിലുമായി മണ്ണിടിച്ചിലിലും ഉരുള്‍ പൊട്ടലിലും നാലു പേരാണ് മരിച്ചത്. സംസ്ഥാനത്തെ ഒമ്പതു ജില്ലകളില്‍ അതിതീവ്രമഴ മുന്നറിയിപ്പുണ്ട്. മുഖ്യമന്ത്രി വിഡി സതീശന്‍ മന്ത്രിമാരുമായും ജില്ലാ കലക്ടര്‍മാരുമായും ബന്ധപ്പെട്ട് സംസ്ഥാനത്തെ മഴക്കെടുതി സാഹചര്യം വിലയിരുത്തി.

കനത്ത മഴയെത്തുടര്‍ന്ന് സംസ്ഥാനത്തെ നിരവധി നദികള്‍ കരകവിഞ്ഞൊഴുകുകയാണ്. നിരവധി ഡാമുകളില്‍ ജലനിരപ്പ് ഉയര്‍ന്നു. ഇതേത്തുടര്‍ന്ന് ഏതാനും ഡാമുകളുടെ ഷട്ടറുകള്‍ തുറക്കുമെന്ന് മുന്നറിയിപ്പ് നല്‍കിയിട്ടുണ്ട്. തൃശൂരിലെ അതിരപ്പിള്ളി, പീച്ചി ഡാമുകളിലേക്കും വിനോദസഞ്ചാര കേന്ദ്രങ്ങളിലേക്കും പ്രവേശനത്തിന് വിലക്ക് ഏര്‍പ്പെടുത്തി. കണ്ണൂരിലും കോട്ടയത്തും ടൂറിസം കേന്ദ്രങ്ങളില്‍ പ്രവേശനത്തിന് വിലക്കുണ്ട്. ഇടുക്കി, കോട്ടയം, കണ്ണൂര്‍ തുടങ്ങിയ ജില്ലകളില്‍ മലയോര മേഖലകളിലേക്കുള്ള രാത്രിയാത്രയ്ക്കും വിലക്ക് ഏര്‍പ്പെടുത്തിയിട്ടുണ്ട്.

ശബരിമല തീര്‍ത്ഥാടകര്‍ക്ക് മുന്നറിയിപ്പുമായി തിരുവിതാംകൂര്‍ ദേവസ്വം ബോര്‍ഡ്. കനത്ത മഴ തുടരുന്ന സാഹചര്യത്തില്‍ ശബരിമല യാത്ര കഴിവതും ഒഴിവാക്കണമെന്ന് ദേവസ്വം ബോര്‍ഡ് അഭ്യര്‍ത്ഥിച്ചു. നിറപുത്തരി ചടങ്ങുകള്‍ക്കായി ശബരിമല നട നാളെയും മറ്റന്നാളും തുറക്കുന്നുണ്ട്. നിറപുത്തരി ദര്‍ശനത്തിനുള്ള യാത്ര ഒഴിവാക്കണമെന്നാണ് ദേവസ്വം ബോര്‍ഡ് ഭക്തരോട് അഭ്യര്‍ത്ഥിച്ചിരിക്കുന്നത്. 

കശുവണ്ടി വികസന കോര്‍പ്പറേഷന്‍ അഴിമതിക്കേസില്‍ ആരോപണവിധേയനായ കോര്‍പ്പറേഷന്‍ മുന്‍ എംഡി കെ എ രതീഷിനോട് രാജിവെക്കാന്‍ മുഖ്യമന്ത്രി വിഡി സതീശന്‍ നിര്‍ദേശം നല്‍കിയതായി സൂചന. ഖാദി ബോര്‍ഡ് സെക്രട്ടറിയായി രതീഷ് തുടരുന്നതില്‍ ഹൈക്കോടതി കടുത്ത അതൃപ്തി പ്രകടിപ്പിച്ചിരുന്നു. കേസില്‍ അഴിമതി നിരോധന നിയമപ്രകാരമുള്ള കുറ്റം കൂടി ചുമത്തി സിബിഐ കുറ്റപത്രം സമര്‍പ്പിച്ചു.

കോമണ്‍വെല്‍ത്ത് ഗെയിംസ് വനിതാ ബോക്‌സിങില്‍ ഇന്ത്യക്ക് സ്വര്‍ണം സമ്മാനിച്ച് പ്രീതി പവാറും പിന്നാലെ ജയ്‌സ്മിന്‍ ലംബോറിയയും. ഫൈനലില്‍ കാനഡയുടെ സ്‌കാര്‍ലറ്റ് ഡെല്‍ഗാഡോയെ വീഴ്ത്തിയാണ് പ്രീതിയുടെ നേട്ടം. വടക്കന്‍ അയര്‍ലന്‍ഡ് താരം മിക്കേല വാല്‍ഷിനെ ഇടിച്ചിട്ടാണ് ജയ്‌സ്മിന്റെ നേട്ടം. 54 കിലോ വിഭാഗത്തിലാണ് പ്രീതിയുടെ വിജയം. കോമണ്‍വെല്‍ത്ത് ഗെയിംസ് പുരുഷന്‍മാരുടെ ട്രിപ്പിള്‍ ജംപില്‍ ഇന്ത്യക്ക് ഇരട്ട മെഡല്‍. വെള്ളി, വെങ്കലം മെഡലുകള്‍ ഇന്ത്യ സ്വന്തമാക്കി. പ്രവീണ്‍ ചിത്രാവല്‍ 16.58 മീറ്റര്‍ താണ്ടി വെള്ളി നേടി. സെല്‍വ പ്രഭു തിരുമാരനാണ് വെങ്കലം.