മോഹന്‍ലാലിന്റെ ചിത്രകലാ പാടവം നമ്മള്‍ നേരത്തെ കണ്ടറിഞ്ഞിട്ടുണ്ട്. യുവതാരങ്ങള്‍ക്ക് പലര്‍ക്കും മോഹന്‍ലാല്‍ തന്റെ സൃഷ്ടികള്‍ സമ്മാനിക്കാറുമുണ്ട്. ഇത്തവണ മോഹന്‍ലാലിന്റെ സ്‌പെഷ്യല്‍ സമ്മാനം കിട്ടിയത് നടനും സംവിധായകനുമായ നാദിര്‍ഷയ്ക്കാണ്. മോഹന്‍ലാലിന്റെ മുന്നിലിരുന്ന് അദ്ദേഹത്തെ നോക്കി വരയ്ക്കാന്‍ ശ്രമിക്കുകയായിരുന്നു നാദിര്‍ഷ. അതിനിടെയാണ് മോഹന്‍ലാല്‍ ഒരു സര്‍പ്രൈസ് നല്‍കിയത്.
സോഷ്യല്‍ മീഡിയയിലൂടെ നാദിര്‍ഷയും താന്‍ വരച്ച മോഹന്‍ലാലിന്റെ ചിത്രവും അദ്ദേഹം സമ്മാനിച്ച ചിത്രവും പുറത്തുവിട്ടത്. ''ഞാന്‍ പ്രിയപ്പെട്ട ലാലേട്ടന്റെ മുന്പിലിരുന്ന് അദ്ദേഹത്തെ നോക്കി വരക്കാന്‍ ശ്രമിച്ചു. മറുപടിയായി അദ്ദേഹം എനിക്കും വരച്ചു തന്നു ഒരു പടം. ഒരുപാട് ഇഷ്ടം'' എന്ന കുറിപ്പിലായിരുന്നു ചിത്രങ്ങള്‍ പോസ്റ്റ് ചെയ്തത്.
ഒരു ഭടന്റെ ചിത്രമാണ് നാദിര്‍ഷയ്ക്ക് സമ്മാനിച്ചത്. അയാളുടെ വസ്ത്രം വരച്ചിരിക്കുന്നത് നാദിര്‍ഷയുടെ പേരുകൊണ്ടാണ്. എന്തായാലും മോഹന്‍ലാല്‍ ഒളിപ്പിച്ചുവെച്ച ആ രഹസ്യം ആരാധകര്‍ കണ്ടെത്തി. മോഹന്‍ലാലിനെ പുകഴ്ത്തി നിരവധി കമന്റുകളാണ് പോസ്റ്റിന് താഴെ വരുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
