ബോളിവുഡ് നടി സൊനാക്ഷി സിൻഹ ലോക്ക്ഡൗൺ ലംഘിച്ചു എന്ന ആരോപണവുമായി സംവിധായകൻ വിവേക് അഗ്നിഹോത്രി രംഗത്ത്. താരം പുറത്തുനിൽക്കുന്നതിന്റെ ചിത്രമുള്ള ഒരു ന്യൂസ് പേപ്പർ കട്ടിങ്ങാണ് വിവേക് പങ്കുവെച്ചിരിക്കുന്നത്. എന്നാൽ ഇതിന് മറുപടിയുമായി നടി തന്നെ രംഗത്തെത്തി. താരത്തിന്റെ പഴയ ഫോട്ടോ ആണ് ഇത്. ഇത്തരം വ്യാജ വാർത്ത പങ്കുവെക്കരുത് എന്നാണ് താരം പറയുന്നത്.
ഷൂട്ടിങ് കഴിഞ്ഞ് സ്റ്റുഡിയോയിൽ നിന്ന് പുറത്തിറങ്ങുന്ന സൊനാക്ഷിയുടെ ചിത്രമാണ് വിവേക് ട്വീറ്റ് ചെയ്തിരിക്കുന്നത്. ഈ സമയത്ത് ആരാണ് ഷൂട്ടിങ് നടത്തുന്നത് എന്ന അടിക്കുറിപ്പിലാണ് ചിത്രം പങ്കുവെച്ചിരിക്കുന്നത്. തുടർന്ന് ലോക്ക്ഡൗൺ ലംഘിച്ചു എന്നാരോപിച്ച് താരത്തിനെതിരെ നിരവധിപേർ രംഗത്തെത്തി. ഇതോടെയാണ് മറുപടിയുമായി നടി എത്തിയത്. കഴിഞ്ഞവർഷം നവംബറിലെടുത്ത ചിത്രമാണ് ഇപ്പോഴത്തേതെന്ന് ആരോപിച്ച് പ്രചരിക്കുന്നത്.
സംവിധായകൻ, സിനിമയിലെ നിരവധി യൂണിയനിലെ അംഗം എന്നീ നിലകളിൽ ലോക്ക്ഡൗണിനെ തുടർന്ന് സ്റ്റുഡിയോകളെല്ലാം അടച്ചതിനാൽ ഷൂട്ടിൽ നടക്കുന്നില്ലെന്ന് നിങ്ങൾക്ക് അറിയാമല്ലോ എന്നാണ് താരത്തിന്റെ ചോദ്യം. ഈ സമയത്ത് ഇത്തരത്തിൽ വ്യാജസന്ദേശം പ്രചരിപ്പിക്കുന്നവർക്കെതിരെ എന്തു നടപടിയെടുക്കുമെന്ന് മുംബൈ പൊലീസിനോടും മഹാരാഷ്ട്ര മുഖ്യമന്ത്രിയോടും താരം ചോദിച്ചു.
ഇതിനിടെ ബോളിവുഡ് നടൻ വരുൺ ധവാനും ലോക്കഡൗൺ ലംഘിച്ചെന്ന ആരോപണം നേരിട്ടു. താരത്തിന്റെ രണ്ട് മാസം മുൻപത്തെ ചിത്രമാണ് പ്രചരിപ്പിക്കപ്പെട്ടത്. ഇതിനെതിരെ താരം രൂക്ഷവിമർശനവുമായി രംഗത്തെത്തിയിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
