മലയാള സിനിമയിലെ എക്കാലത്തേയും ക്ലാസിക് ചിത്രങ്ങളിൽ ഒന്നാണ് വൈശാലി. ഭരതൻ സംവിധാനം ചെയ്ത ചിത്രം ഇന്നും ആരാധകര പ്രേമികളുടെ പ്രിയപ്പെട്ടതാണ്. ഇപ്പോൾ ഇതാ ചിത്രത്തിലെ പ്രധാന കഥാപാത്രങ്ങളായ ഋഷ്യശൃംഗനെയും വൈശാലിയും വീണ്ടും എത്തുകയാണ്.
വൈശാലി സിനിമയെ ആസ്പദമാക്കിയുള്ള ഫോട്ടോഷൂട്ടാണ് സോഷ്യൽ മീഡിയയിൽ ശ്രദ്ധ നേടുന്നത്. ഋഷ്യശൃംഗന്റേയും വൈശാലിയുടേയും കൂടിക്കാഴ്ചയും ഇവരുടെ പ്രണയവുമാണ് ഫോട്ടോഷൂട്ടിൽ പുനരവതരിപ്പിച്ചിരിക്കുന്നത്. ദമ്പതികളായ അഭിജിത് ജിത്തുവും മാകു മായയും ഋഷ്യശൃംഗനും വൈശാലിയുമായി നിറഞ്ഞു നിൽക്കുകയാണ് ചിത്രങ്ങളിൽ.
വൈശാലി സിനിമയിലേതുപോലെ വേഷം ധരിച്ചാണ് ഇരുവരേയും കാണുന്നത്. കാഷായ വസ്ത്രവും രുദ്രാക്ഷവും അണിഞ്ഞ് തലമുടി ഉയർത്തിക്കെട്ടിയാണ് വൈശാലി എത്തുന്നത്. മുഷിഞ്ഞ വേഷവും മുടിയും താടിയും നാട്ടിയ ഋഷ്യശ്യംഗനും സിനിമയോട് നീതി പുലർത്തുന്നുണ്ട്.
പുഴക്കരയിൽവച്ച് ഇരുവരും ആദ്യമായി കാണുന്നതു മുതലാണ് ചിത്രങ്ങൾ. ഫോട്ടോഗ്രാഫർ മിഥുൻ സാർക്കരയാണ് മനോഹരമായ ഫോട്ടോഷൂട്ട് പകർത്തിയത്. അദ്ദേഹത്തിന്റേതു തന്നെയാണ് ആശയം. സുകീഷ് കോസ്റ്റ്യുംസ് ഒരുക്കിയിരിക്കുന്നത്. ഭരതന്റെ ക്ലാസിക് ഷോട്ടുകൾ പകർത്താനും മിഥുൻ ശ്രമം നടത്തിയിട്ടുണ്ട്.
വൈശാലി സിനിമയെ ആസ്പദമാക്കി ഫോട്ടോഷൂട്ട് ഒരുക്കണമെന്ന ആശയം തോന്നിയപ്പോൾ അത് യാഥാർത്ഥ്യമാക്കാൻ സുഹൃത്തുക്കൾ മുന്നോട്ടുവരുകയായിരുന്നു എന്നാണ് മിഥുൻ പറയുന്നത്. എന്തായാലും സോഷ്യൽ മീഡിയയിൽ വൈറലാവുകയാണ് ചിത്രങ്ങൾ.
മലയാളത്തിലെ എക്കാലത്തെയും മനോഹരമായ ചിത്രങ്ങളിലൊന്നാണ് എം. ടി. വാസുദേവൻ നായർ-ഭരതൻ കൂട്ടുകെട്ടിൽ പിറന്ന വൈശാലി. സഞ്ജയ്–സുപർണ താരജോഡികളാണ് പ്രധാനവേഷത്തിൽ എത്തിയത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ