ആസിഡ് ആക്രമണത്തെ അതിജീവിച്ച ലക്ഷ്മി അഗര്‍വാളിന്റെ ജീവിതം പ്രമേയമാക്കി ഒരുക്കിയിരിക്കുന്ന ചപ്പാക്ക് എന്ന ചിത്രത്തിന്മേല്‍ അവകാശവാദവുമായി എഴുത്തുകാരന്‍ രാകേഷ് ഭാരതി. ചപ്പാക്ക് ഒരുക്കിയിരിക്കുന്നത് തന്റെ തിരക്കഥയുടെ അടിസ്ഥാനത്തിലാണെന്ന് അവകാശപ്പെട്ടാണ് അദ്ദേഹം കോപ്പിറൈറ്റ് ലംഘനത്തിന് പരാതി നല്‍കിയിരിക്കുന്നത്. നടിയും ചിത്രത്തിന്റെ നിര്‍മാതാക്കളില്‍ ഒരാളുമായ ദീപികയ്ക്കും ചപ്പാക് സംവിധായിക മേഘ്‌ന ഗുല്‍സാറിനും എതിരാണ് രാകേഷിന്റെ പരാതി.
രാകേഷ് മകനുമായി ചേര്‍ന്ന് ചിത്രം നിര്‍മ്മിക്കുന്നതിന്റെ ആലോചനകളിലായിരുന്നെന്നും 2015 മെയ്യില്‍ ചിത്രത്തിന്റെ പേര് രജിസ്റ്റര്‍ ചെയ്തിരുന്നതാണെന്നും പരാതിയില്‍ പറയുന്നു. ബ്ലാക്ക് ഡേ എന്നാണ് രാകേഷ് രജിസ്റ്റര്‍ ചെയ്ത പേര്.
ഐശ്വര്യ റായിയും കങ്കണയും അടക്കമുള്ള നടിമാരെ കഥയുമായി സമീപിച്ചിരുന്നെന്നും ഫോക്‌സ് സ്റ്റാര്‍ സ്റ്റുഡിയോസുമായി ചിത്രത്തിന്റെ നിര്‍മാണത്തെക്കുറിച്ച് സംസാരിച്ചിരുന്നെന്നും രാകേഷ് പറയുന്നു. ഫോക്‌സ് സ്റ്റാര്‍ സ്റ്റുഡിയോസില്‍ താന്‍ തിരക്കഥയുടെ ഒരു പകര്‍പ്പ് നല്‍കിയിരുന്നെന്നും എന്നാല്‍ ഇതുപയോഗിച്ച് മറ്റൊരു ചിത്രം നിര്‍മ്മിക്കുകയാണ് അവര്‍ ചെയ്തതെന്നും രാകേഷ് ആരോപിക്കുന്നു. തന്റെ തിരക്കഥയില്‍ ചില മാറ്റങ്ങള്‍ വരുത്തി ചപ്പാക്ക് എന്ന പേരില്‍ റിലീസ് ചെയ്യുകയാണെന്നാണ് ഇദ്ദേഹം പറയുന്നത്.
ഫോക്‌സ് സ്റ്റാര്‍ സ്റ്റുഡിയോ, മൃഗ പ്രൊഡക്ഷന്‍സ്, ദീപികയുടെ കാ പ്രൊഡക്ഷന്‍ എന്നിവര്‍ ചേര്‍ന്നാണ് ചപ്പാക്ക് നിര്‍മ്മിച്ചിരിക്കുന്നത്. ഈ മാസം പത്താം തിയതി ചിത്രം തിയേറ്ററുകളിലെത്തും.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
