ലോക്ക്ഡൗണിനിടെ വൈദ്യുതി ബില്ലില്‍ ഉണ്ടായ കുതിപ്പ് പല ബോളിവുഡ് താരങ്ങളെയടക്കം അമ്പരപ്പിച്ചിരുന്നു. ഇവരില്‍ പലരും ക്രമക്കേട് ചൂണ്ടിക്കാട്ടി രംഗത്തെത്തുകയും ചെയ്തു. ഇത്തരത്തില്‍ പ്രതികരിച്ചവരില്‍ ഒരാളാണ് നടി സോഹ അലി ഖാന്‍. എന്നാലിപ്പോള്‍ ഉയര്‍ന്ന വൈദ്യുതി ബില്‍ വന്നതില്‍ ക്രമക്കേടില്ലെന്നും ബില്ലിലെ സംശയങ്ങള്‍ ദൂരീകരിച്ചെന്നും നടി ട്വിറ്ററിലൂടെ അറിയിച്ചു.
അഡാനി ഇലക്ട്രിസിറ്റി കമ്പനിയുടെ ഉപയോക്താവാണ് സോഹ. പതിവായി തനിക്ക് ലഭിച്ചിരുന്ന വൈദ്യുതി ബില്ലിനേക്കാള്‍ മൂന്ന് മടങ്ങ് അധിക തുകയാണ് ഇക്കുറി ബില്ലില്‍ രേഖപ്പെടുത്തിയിരിക്കുന്നത് എന്ന് കാണിച്ചാണ് നടി ആദ്യം രംഗത്തുവന്നത്. എന്നാല്‍ കമ്പനി അധികൃതരുമായി സംസാരിച്ചെന്നും ബില്ലില്‍ കൃത്രിമമില്ലെന്നും നടി പുതിയ ട്വീറ്റില്‍ കുറിച്ചു.
കഴിഞ്ഞ മാസങ്ങളില്‍ തനിക്ക് ലഭിച്ചിരുന്ന ബില്ലിലെ തുക യഥാര്‍ത്ഥ ഉപഭോഗത്തേക്കാള്‍ കുറവായിരുന്നെന്നും ഈ തുക ചേര്‍ത്ത ബില്‍ ആണ് ഇക്കുറി ലഭിച്ചിരിക്കുന്നതെന്നും നടി വിശദീകരിച്ചു. കഴിഞ്ഞ വര്‍ഷത്തെ ബില്‍ തുകകളുമായി താരതമ്യം ചെയ്താണ് ഇക്കാര്യത്തില്‍ വ്യക്തത വരുത്തിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
