സിനിമയുടേയും ടെലിവിഷന്‍ ഷൂട്ടിങ് നിര്‍ത്തിവെക്കണം എന്നാവശ്യപ്പെട്ട് ബോളിവുഡ് നടി ബിപാഷ ബസു. ഷൂട്ടിങ് സെറ്റില്‍ അഭിനേതാക്കളെയാണ് ഏറ്റവും കൂടുതല്‍ ബാധിക്കുന്നത് എന്നാണ് ബിപാഷ വ്യക്തമാക്കി. നടന് പാര്‍ഥ് സംതാന്‍ കോവിഡ് പോസ്റ്റീവായി എന്ന വാര്‍ത്തയ്ക്ക് താഴെ കമന്റായിട്ടാണ് താരം നിലപാട് വ്യക്തമാക്കിയത്.
'സാഹചര്യം കുറച്ചുകൂടി മെച്ചപ്പെടുന്നതുവരെ എല്ലാം ഷൂട്ടിങ്ങുകളും നിര്‍ത്തിവെക്കണം. അഭിനേതാക്കളാണ് ഏറ്റവും കൂടുതല്‍ ബാധിക്കപ്പെടുന്നത്. യൂണിറ്റിലെ ഭൂരിഭാഗം പേരും പിപിഇ കിറ്റും ഗൗസും മാസ്‌കും ഷീല്‍ഡും അണിഞ്ഞ് സുരക്ഷിതരായാണ് നില്‍ക്കുന്നത്. എന്നാല്‍ അഭിനേതാക്കള്‍ ഒരു സുരക്ഷയുമില്ലാതെ അഭിനയിക്കേണ്ടതായി വരും. അത് വളരെ റിസ്‌കിയാണ്.' - ബിപാഷ കുറിച്ചു.
കഴിഞ്ഞ ആഴ്ചയാണ് പാര്‍ഥിന് രോഗം സ്ഥിരീകരിച്ചത്. തുടര്‍ന്ന് പാര്‍ഥ് അഭിനയിച്ചിരുന്ന കസൗതി സിന്തഗീ കെയില്‍ ഇപ്പോള്‍ അഭിനയിക്കുന്നത് ബിപാഷയുടെ ഭര്‍ത്താവ് കരണ്‍ സിങ് ഗ്രോവറാണ്. കുറച്ച് എപ്പിസോഡിന്റെ ചിത്രീകരണവും കഴിഞ്ഞു. കോവിഡ് വ്യാപനത്തെ തുടര്‍ന്ന് രണ്ട് മാസത്തില്‍ അധികം പൂര്‍ണമായി നിര്‍ത്തിവെച്ചതിന് ശേഷമാണ് ഷൂട്ടിങ് വീണ്ടും ആരംഭിച്ചത്. അതിനിടെ കൂടുതല്‍ താരങ്ങള്‍ രോഗബാധിതരാകുന്നത് ബോളിവുഡിനെ ആശങ്കയിലാക്കുന്നുണ്ട്. കഴിഞ്ഞ ദിവസമാണ് അമിതാഭ് ബച്ചനും കുടുംബത്തിനും കോവിഡ് സ്ഥിരീകരിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
