കോവിഡ് സ്ഥിരീകരിച്ചതോടെ ആശുപത്രിയില് ചികിത്സയില് കഴിയുകയാണ് ബോളിവുഡ് സൂപ്പര്താരം അമിതാഭ് ബച്ചനും അഭിഷേക് ബച്ചനും. ആശുപത്രിയില് ചികിത്സയില് കഴിയുന്നതിനിടെ പരിഹാസവുമായി എത്തിയ യുവതിക്ക് അഭിഷേക് നല്കിയ മറുപടിയാണ് ഇപ്പോള് വൈറലാവുന്നത്. കഴിഞ്ഞ ദിവസം താരം തന്റെ പുതിയ വെബ് സീരീസ് ബ്രീത്ത് ഇന്ടു ദി ഷാഡോസിനെക്കുറിച്ചുള്ള ട്വീറ്റ് പങ്കുവെച്ചിരുന്നു. ഇതിന് താഴെയാണ് താരത്തെ പരിഹസിച്ചുകൊണ്ടുള്ള കമന്റ് എത്തിയത്.
അച്ഛനെ ആശുപത്രിയില് പ്രവേശിപ്പിച്ചിരിക്കുകയല്ലേ, ഇപ്പോള് ആരാണ് നിങ്ങളെ തീറ്റിപ്പോറ്റുന്നത് എന്നാണ് പരുള് കൗഷിക് എന്നായിരുന്നു യുവതിയുടെ ചോദ്യം. ഇതിന് രസകരമായിട്ടാണ് താരം മറുപടി നല്കിയത്. ഇപ്പോള് ഞങ്ങള് രണ്ടുപേരും ആശുപത്രിയില് കിടന്നുകൊണ്ടാണ് ഭക്ഷണം കഴിക്കുന്നത് എന്നായിരുന്നു മറുപടി. എന്നാല് അതുകൊണ്ടൊന്നും അവരുടെ വായടക്കാന് ആയില്ല, വേഗം രോഗമുക്തി നേടൂ സാര്, വെറുതെ കിടന്നുകൊണ്ട് ഭക്ഷണം കഴിക്കാന് എല്ലാവര്ക്കും ഭാഗ്യം ഉണ്ടാവണമെന്നില്ല- എന്നാണ് അവര് പറഞ്ഞത്. താനും കുടുംബവും ഇപ്പോള് അനുഭവിക്കുന്ന ബുദ്ധിമുട്ടുകളെക്കുറിച്ച് വ്യക്തമാക്കുന്നതായിരുന്നു താരത്തിന്റെ മറുപടി. ഞങ്ങള് ഇപ്പോള് കടന്നുപോകുന്ന അനുഭവം നിങ്ങള്ക്ക് ഒരിക്കലും ഉണ്ടാവാതിരിക്കട്ടേ എന്ന് ഞാന് പ്രാര്ത്ഥിക്കുന്നു. സുരക്ഷിതയും ആരോഗ്യവതിയുമായി ഇരിക്കൂ, നിങ്ങളുടെ ആശംസയ്ക്ക് നന്ദി- താരം കുറിച്ചു.
പരിഹാസത്തിനും മാന്യമായി മറുപടി നല്കിയ അഭിഷേകിനെ പ്രശംസിച്ചുകൊണ്ട് നിരവധി പേരാണ് രംഗത്തെത്തിയത്. അതിനിടെ താരത്തെ പരിഹസിച്ച വ്യക്തിയെ വിമര്ശിച്ചുകൊണ്ടും നിരവധി കമന്റുകള് എത്തി. കോവിഡ് സ്ഥിരീകരിച്ചതോടെ മുംബൈയിലെ നാനാവദി ആശുപത്രിയില് ചികിത്സയിലാണ് ഇരുവരും. ഐശ്വര്യ റായിക്കും മകള് ആരാധ്യയ്ക്കും രോഗം സ്ഥിരീകരിച്ചെങ്കിലും ഇവര് രോഗമുക്തി നേടുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ