സണ്ണി വെയിനിനേയും അന്ന ബെന്നിനേയും പ്രധാന കഥാപാത്രങ്ങളാക്കി ജൂഡ് ആന്റണി സംവിധാനം ചെയ്ത സാറാസ് മികച്ച അഭിപ്രായം നേടി മുന്നേറുകയാണ്. ആമസോണ് പ്രൈമിലൂടെ പ്രധർശനത്തിന് എത്തിയ ചിത്രം പുതിയ ചർച്ചകൾക്ക് വഴി തുറന്നിരിക്കുകയാണ്. ചിത്രത്തിൽ മല്ലിക സുകുമാരനും പ്രധാന വേഷത്തിൽ എത്തുന്നുണ്ട്. അതിനിടെ ചിത്രത്തിൽ പൃഥ്വിരാജിന്റെ സാന്നിധ്യം സംശയിച്ചുകൊണ്ട് ട്രോളന്മാരും രംഗത്തെത്തി.
അന്നയുടെ കഥാപാത്രത്തോട് പിണങ്ങി കാറിൽ കയറിപ്പോകുന്ന മല്ലികയെ ചിത്രത്തിൽ കാണിക്കുന്നുണ്ട്. എന്നാൽ ആ കാറ് ഓടിച്ചിരുന്നത് പൃഥ്വിരാജാണ് എന്നായിരുന്നു ഒരു വിഭാഗത്തിന്റെ 'കണ്ടുപിടുത്തം'. ഇതിന്റെ ട്രോളും ഹിറ്റായി. അതിനു പിന്നാലെ ട്രോളന്മാർക്ക് മറുപടിയുമായി എത്തിയിരിക്കുകയാണ് ജൂഡ്. കാർ ഓടിക്കുന്നത് പൃഥ്വിരാജ് അല്ലെന്നാണ് അദ്ദേഹം പറയുന്നത്.
മല്ലികാമ്മയെ ഞാൻ എന്റെ അമ്മയെപ്പോലെയാണ് കാണുന്നത്. അവരുടെ മകനെപ്പോലെയാണ് ഞാൻ എന്നു പറയാൻ അഭിമാനമുണ്ട്. അതുകൊണ്ട് രാജു എന്റെ സഹോദരനെപ്പോലെയാണ് എന്നാൽ ഈ കാണുന്നത് പൃഥ്വിരാജ് അല്ല- ജൂഡ് കുറിച്ചു. അതിനിടെ രസകരമായ നിരവധി കമന്റുകളാണ് പോസ്റ്റിന് താഴെ വരുന്നത്. രാജുവാണെങ്കിൽ ലംബോർഗിനിയിലായിരിക്കും വരിക എന്നാണ് ഒരു ആരാധകൻ കുറിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ