മലയാളത്തിലെ അതുവരെയുണ്ടായിരുന്ന എല്ലാ റെക്കോഡുകളും തകർത്ത ചിത്രമാണ് മോഹൻലാലിന്റെ പുലിമുരുകനും. മലയാളത്തിൽ നിന്ന് ആദ്യ നൂറു കോടിയിൽ ഇടംപിടിച്ച ചിത്രം. ഇപ്പോൾ പുലിമുരുകൻ ടീം വീണ്ടും ഒന്നിക്കുകയാണ്. മോഹൻലാലും സംവിധായകൻ വൈശാഖും തിരക്കഥകൃത്ത് ഉദയ്കൃഷ്ണയും വീണ്ടും ഒന്നിക്കുകയാണ് മറ്റൊരു ചിത്രത്തിലൂടെ.
പുലിമുരുകൻ ടീം
സിനിമയുടെ ചിത്രീകരണം നവംബര്‍ 10ന് എറണാകുളത്ത് ആരംഭിക്കുമെന്ന് കാന്‍ ചാനല്‍ മീഡിയ റിപ്പോര്‍ട്ട് ചെയ്യുന്നു. ഷാജി കൈലാസ് സംവിധാനം ചെയ്‍ത 'എലോണി'നു ശേഷം മോഹന്‍ലാല്‍ അഭിനയിക്കുന്ന ചിത്രമാണിത്. ആന്‍റണി പെരുമ്പാവൂര്‍ തന്നെയാണ് നിര്‍മ്മാണം. 2019 ലാണ് ഈ ചിത്രത്തെക്കുറിച്ചുള്ള പ്രഖ്യാപനം വരുന്നത്. എന്നാൽ പിന്നീട് കൂടുതൽ വിവരങ്ങൾ പുറത്തുവന്നില്ല. അതിനിടെ മോഹൻലാൽ നിരവധി സിനിമകളിൽ അഭിനയിക്കുകയും ചെയ്തു. ആരാധകർ ഹിറ്റ് ജോഡികളുടെ ഒത്തുചേരലിനെക്കുറിച്ച് മറന്നിരിക്കുമ്പോഴാണ് പുതിയ റിപ്പോർട്ടുകൾ വരുന്നത്.
മരക്കാർ മുതൽ എലോൺ വരെ
അതേസമയം മോഹന്‍ലാലിന്‍റേതായി നിരവധി ചിത്രങ്ങളാണ് പുറത്തിറങ്ങാനിരിക്കുന്നത്. 100 കോടി ബജറ്റ് ചിത്രം മരക്കാര്‍ അറബിക്കടലിന്‍റെ സിംഹമാണ് അതില്‍ ഏറ്റവും പ്രധാനപ്പെട്ടത്. ബി ഉണ്ണികൃഷ്‍ണന്‍റെ ആറാട്ട്, പൃഥ്വിരാജിന്‍റെ ബ്രോ ഡാഡി, ജീത്തു ജോസഫ് ചിത്രം 12ത്ത് മാന്‍, ഷാജി കൈലാസ് ചിത്രം എലോണ്‍ എന്നിവയും ചിത്രീകരണം പൂര്‍ത്തിയാക്കിയവയാണ്. തന്‍റെ സംവിധാന അരങ്ങേറ്റമായ ബറോസ്, ജീത്തു ജോസഫിന്‍റെ റാം എന്നിവയാണ് മോഹന്‍ലാലിന് പൂര്‍ത്തിയാക്കാനുള്ളത്. ലൂസിഫറിന്‍റെ സീക്വല്‍ ആയ എമ്പുരാന്‍ ഇനിയും ചിത്രീകരണം ആരംഭിച്ചിട്ടില്ല.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
