'ദൃശ്യം 3 ജീത്തുവിന്റെ മനസിലുണ്ട്, മോഹൻലാലുമായി സംസാരിച്ചു'; വെളിപ്പെടുത്തി ആന്റണി പെരുമ്പാവൂർ

മോഹൻലാലും ജീത്തു ജോസഫും ഒന്നിച്ച ദൃശ്യം 2 പ്രേക്ഷകരിലേക്ക് എത്തിയിരിക്കുകയാണ്. ആമസോൺ പ്രൈമിലൂടെ ഇന്നലെ രാത്രിയാണ് ചിത്രം എത്തിയത്. മികച്ച അഭിപ്രായം നേടി മുന്നേറുകയാണ് ചിത്രം. അതിനിടെ ചിത്രത്തിന് മൂന്നാം ഭാ​ഗമുണ്ടാകുമെന്ന് വെളിപ്പെടുത്തിയിരിക്കുകയാണ് നിർമാതാവ് ആന്റണി പെരുമ്പാവൂർ. ജീത്തു ജോസഫിന്റെ മനസിൽ ദൃശ്യം 3 ഉണ്ടെന്നാണ് ആന്റണി പറയുന്നത്. മോഹൻലാലുമായി സംസാരിക്കുന്നുണ്ടെന്നും മനോരമക്ക് നൽകിയ അഭിമുഖത്തിൽ അദ്ദേഹം പറഞ്ഞു. 

ദൃശ്യം 3 സിനിമ ജീത്തുവിന്റെ മനസ്സിലുണ്ട്. അത് അദ്ദേഹത്തിന്റെ സംസാരത്തിൽ നിന്ന് മനസ്സിലായതാണ്.  അതുണ്ടാകുമെന്നാണ് പ്രതീക്ഷിക്കുന്നത്. ലാൽ സാറും ജീത്തുവും അതേപ്പറ്റി സംസാരിക്കുന്നുണ്ട്. ദൃശ്യം 3 ഞങ്ങളെല്ലാം ആഗ്രഹിക്കുന്നു.- ആന്റണി പെരുമ്പാവൂർ വ്യക്തമാക്കി. 

ദൃശ്യം 2 എല്ലാ ഭാഷകളിലേക്കും റിമേക്ക് ചെയ്യുമെന്നും അദ്ദേഹം കൂട്ടിച്ചേർത്തു. ചിത്രത്തിന്റെ ആദ്യ ഭാ​ഗം തെന്നിന്ത്യൻ ഭാഷകളിലേക്കും ഹിന്ദിയിലേക്കും ചൈനീസിലേക്കും മൊഴി മാറ്റിയിരുന്നു. എല്ലാ റീമേക്കുകൾക്കും മികച്ച അഭിപ്രായമാണ് ലഭിച്ചത്. ചിത്രം ഹോളിവുഡിലേക്കും റീമേക്ക് ചെയ്യാൻ ഒരുങ്ങുന്നതായും വാർത്തകളുണ്ടായിരുന്നു.