തെന്നിന്ത്യൻ നടൻ ആര്യ വിവാഹവാഗ്ദാനം നൽകി വഞ്ചിച്ച് പണം തട്ടിയതായി പരാതി. വിദ്ജ നവരത്‌നരാജ എന്ന ജർമ്മൻ യുവതിയാണ് പരാതി നൽകിയിരിക്കുന്നത്. നടൻ 80 ലക്ഷം രൂപ തട്ടിയെടുത്തതായാണ് പരാതി. പ്രധാനമന്ത്രിയുടെ ഓഫീസിനും രാഷ്ട്രപതിക്കുമാണ് ഇതുസംബന്ധിച്ച് പരാതി നൽകിയത്.
ചെന്നൈയിൽ മെഡിക്കൽ രംഗത്ത് ജോലി ചെയ്യുന്നതിനിടയിലാണ് യുവതി ആര്യയുമായി പരിചയപ്പെട്ടത്. കോവിഡ് സമയത്ത് ലോക്ഡൗൺ പ്രഖ്യാപിച്ചതോടെ സിനിമകൾ കുറഞ്ഞുവെന്നും, സാമ്പത്തിക ബുദ്ധിമുട്ടുകളുണ്ടെന്നും ആര്യ പറഞ്ഞിരുന്നുവെന്ന് യുവതി പരാതിയിൽ പറയുന്നു. പിന്നീട് സാമ്പത്തിക സഹായം ആവശ്യപ്പെടുകയായിരുന്നു.
തന്നെ ഇഷ്ടമാണെന്നും വിവാഹം ചെയ്യാമെന്നും ആര്യ പറഞ്ഞിരുന്നെന്നാണ് യുവതിയുടെ ആരോപണം. സമാനമായ രീതിയിൽ നിരവധി പേരെ ആര്യ വഞ്ചിച്ചിട്ടുള്ളതായി പിന്നീട് അറിഞ്ഞെന്നും യുവതി പരാതിയിൽ പറയുന്നു. പണം തിരികെ ആവശ്യപ്പെട്ട് വിളിച്ചപ്പോൾ ആര്യയും മാതാവും ഭീഷണിപ്പെടുത്തിയെന്നും വിദ്ജ പറയുന്നു. പരസ്പരം സംസാരിച്ചതിൻറെയും സാമ്പത്തിക ഇടപാടുകൾ നടത്തിയതിൻറെയും തെളിവുകൾ കൈവശമുണ്ടെന്നും നടനെതിരെ നേരത്തെയും പരാതി നൽകിയിരുന്നെങ്കിലും നടപടി ഉണ്ടായില്ലെന്നും യുവതി പറഞ്ഞു. യുവതിയുടെ പരാതിയുമായി ബന്ധപ്പെട്ട് ആര്യ ഇതുവരെ പ്രതികരിച്ചിട്ടില്ല.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
