ക്രിസ്മസ് റിലീസായി തിയറ്ററിൽ എത്തിയ ചിത്രമാണ് അജഗജാന്തരം. ആന്റണി വർഗീസിനെ നായകനാക്കി ടിനു പാപ്പച്ചൻ സംവിധാനം ചെയ്ത ചിത്രം മികച്ച അഭിപ്രായം നേടി മുന്നേറുകയാണ്. ആദ്യ ആഴ്ചയിൽ തന്നെ ആഗോള തലത്തിൽ നിന്ന് 20 കോടി ബോക്സ് ഓഫിസ് കളക്ഷനാണ് ചിത്രം നേടിയത്. ഇപ്പോൾ ഇതാ മറ്റൊരു നാഴികക്കല്ലു കൂടി പിന്നിട്ടിരിക്കുകയാണ്.
വൈറലായി ഗാനം
ചിത്രത്തിലെ ഓളുള്ളേരു എന്ന ഗാനം ഒരു കോടി തൊട്ടിരിക്കുകയാണ്. ചിത്രത്തിന്റെ റിലീസിന് മുൻപാണ് ആഘോഷ ഗാനമായ ഓളുള്ളേരു യൂട്യൂബിൽ എത്തുന്നത്. അപ്പോൾ മുതൽ ഗാനം ആരാധകർ നെഞ്ചിലേറ്റിയിരുന്നു. ഗാനം ഒരു കോടി കാഴ്ചക്കാർ കടന്ന വിവരം ആന്റണി വർഗീസാണ് അറിയിച്ചത്. "ആൾക്കൂട്ടങ്ങളും, ക്യാമ്പസുകളും, തിയറ്ററുകളും കടന്ന് 'ഒള്ളുള്ളേരു' ആഘോഷങ്ങളുടെ ഭാഗമാകുന്നു! ഗാനത്തിന്‌ ഒരുകോടി യുട്യൂബ്‌ കാഴ്ചക്കാർ!"- എന്ന കുറിപ്പിലാണ് സന്തോഷം പങ്കുവച്ചത്.
ഒരാഴ്ചയിൽ 20 കോടി
ഡിസംബര്‍ 23ന് 198 സ്‌ക്രീനുകളിലായാണ് ചിത്രം റിലീസ് ചെയ്തത്. കേരളത്തില്‍ റിലീസ് ചെയ്തതിന് പിന്നാലെ ഗള്‍ഫില്‍ സിനിമ റിലീസ് ചെയ്തിരുന്നു. ആന്റണി വർഗീസിന്റെ കരിയറിലെ ഏറ്റവും മുതൽ മുടക്കുള്ള ചിത്രമാണ്.ഉത്സവപ്പറമ്പിലേയ്ക്ക്‌ ഒരു ആനയും പാപ്പാനും ഒപ്പം ഒരു കൂട്ടം യുവാക്കളും എത്തുന്നതും തുടർന്നവിടെ 24 മണിക്കൂറിനുള്ളിൽ അരങ്ങേറുന്ന ആകാംഷ നിറഞ്ഞ സംഭവങ്ങളുമാണ്‌ ചിത്രത്തിന്റെ പ്രമേയം. അർജുൻ അശോകൻ, ചെമ്പൻ വിനോദ് ജോസ്, സാബു മോൻ, ജാഫർ ഇടുക്കി, രാജേഷ് ശർമ, സുധി കോപ്പ, വിനീത് വിശ്വം, ലുക്മാൻ, കിച്ചു ടെല്ലസ്, ശ്രീരഞ്ജിനി തുടങ്ങിയ വലിയൊരു താരനിര ചിത്രത്തിൽ കഥാപാത്രങ്ങളായി എത്തുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
