തൃശൂർ; ഗുരുവായൂർ നഗരസഭയുടെ ശുചിത്വ അംബാസിഡറായി നടി നവ്യ നായരെ തെരഞ്ഞെടുത്തു. "ശുചിത്വ നഗരം ശുദ്ധിയുള്ള ഗുരുവായൂർ" പദ്ധതിയുമായി ബന്ധപ്പെട്ട് മാലിന്യ സംസ്കരണ പ്രവർത്തനങ്ങൾ ഊർജിതമാക്കുന്നതിന്റെ ഭാഗമായാണ് നഗരസഭയുടെ തീരുമാനം. ഇന്ന് ചേർന്ന യോഗത്തിലാണ് നഗരസഭ കൗൺസിൽ ഏകകണ്ഠമായി നവ്യയുടെ പേര് പ്രഖ്യാപിച്ചത്.
നഗരസഭയുടെ ശുചിത്വ പരിപാലന പ്രവർത്തനങ്ങളെ കുറിച്ച് പൊതുജനങ്ങൾക്കിടയിൽ അവബോധം സൃഷ്ടിക്കുന്നതിനും നഗരസഭയുടെ മാലിന്യ സംസ്കരണ പ്രവർത്തനങ്ങളുടെ പ്രചരണത്തിനുമായാണ് നവ്യ നായരെ ശുചിത്വ അംബാസിഡറായി തെരഞ്ഞെടുത്തത്. "ശുചിത്വ നഗരം ശുദ്ധിയുള്ള ഗുരുവായൂർ" പദ്ധതിയുടെ ഭാഗമായി നഗരസഭയുടെ മാലിന്യ സംസ്കരണ പ്രവർത്തനങ്ങൾ കൂടുതൽ ശക്തമാക്കുമെന്നും, പൊതുജനങ്ങൾ ഇതിനോട് സഹകരിക്കണമെന്നും കൗൺസിൽ അഭ്യർത്ഥിച്ചു.
ഒരുത്തി എന്ന ചിത്രത്തിലൂടെ മലയാളത്തിലേക്ക് തിരിച്ചുവരവിന് ഒരുങ്ങുകയാണ് താരം. കഴിഞ്ഞ ദിവസം ചിത്രത്തിലെ ഗാനം പുറത്തുവന്നിരുന്നു. വികെ പ്രകാശം സംവിധാനം ചെയ്യുന്ന ചിത്രത്തിൽ വിനയൻ, സൈജു കുറുപ്പ് തുടങ്ങിയവർ പ്രധാന വേഷത്തിലെത്തുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
