ന്യൂഡല്ഹി: ലഡാക് മേഖലയില് അതിക്രമിച്ചു കടക്കാനുള്ള ചൈനയുടെ ശ്രമം ഇന്ത്യന് സൈന്യം തടഞ്ഞു. പാന്ഗോങ് തടാകത്തിന്റെ തീരത്തുള്ള ഇന്ത്യന് അതിര്ത്തിയിലാണ് സംഭവം. കല്ലേറില് ഇരുവിഭാഗത്തുമുള്ള സൈനികര്ക്ക് നിസാര പരിക്ക് പറ്റിയെന്ന് അധികൃതര് അറിയിച്ചു.
രണ്ടു തവണയാണ് ചൈനയുടെ പീപ്പിള്സ് ലിബറേഷന് ആര്മി (പിഎല്എ) അതിക്രമിച്ചു കടക്കാന് ശ്രമിച്ചത്. രണ്ടു തവണയും ഇന്ത്യന് സൈന്യം കൃത്യമായി പ്രതികരിച്ചതിനാല് ചൈനീസ് സൈന്യത്തിന് മേഖലയില് പ്രവേശിക്കാന് സാധിച്ചില്ല. ഫിംഗര്4, ഫിംഗര്5 എന്നിവിടങ്ങളിലാണ് ചൈനയുടെ അതിക്രമം ഉണ്ടായത്.
ചൈനീസ് സൈന്യത്തിന്റെ വഴി മനുഷ്യമതില് തീര്ത്ത് ഇന്ത്യന് സൈന്യം തടഞ്ഞു. ഇതേതുടര്ന്ന് ചൈനീസ് സൈനികര്, ഇന്ത്യയുടെ സൈന്യത്തിന് നേരെ കല്ലേറ് നടത്തുകയായിരുന്നു. ഇന്ത്യയും അതേനാണയത്തില് തിരിച്ചടിച്ചുവെന്നാണ് റിപ്പോര്ട്ട്. പിന്നീട്, ഇരുവിഭാഗവും ബാനര് ഡ്രില് നടത്തി പഴയ സ്ഥാനത്തേക്ക് തിരികെ പോവുകയായിരുന്നുവെന്നും റിപ്പോര്ട്ടില് പറയുന്നു. മേഖലയില് സൈന്യം കനത്ത ജാഗ്രതയിലാണ്.
ദോക് ലായെ ചൊല്ലി ജൂണ് 16ന് ആണ് ഇന്ത്യ ചൈന അതിര്ത്തിയില് സംഘര്ഷം വീണ്ടും സജീവമായത്. ഇന്ത്യയും ഭൂട്ടാനും ചൈനയും ചേരുന്ന െ്രെടജംക്ഷനിലാണ് ഇപ്പോള് പ്രശ്നം. ദോക് ലായില് ചൈന റോഡു നിര്മിക്കാന് തീരുമാനിച്ചതായിരുന്നു കാരണം. അതിര്ത്തിയിലെ തല്സ്ഥിതി ലംഘിച്ചതു ചൈനയാണെന്നാണ് ഇന്ത്യ കുറ്റപ്പെടുത്തുന്നത്. എന്നാല്, ഇന്ത്യന് സൈന്യമാണ് അതിര്ത്തി ലംഘിച്ചതെന്നാണ് ചൈനയുടെ ആരോപണം. സംഘര്ഷത്തെ തുടര്ന്ന് ഇരു സൈനിക വിഭാഗവും അതിര്ത്തിയില് സാന്നിധ്യം വര്ധിപ്പിച്ചിരിക്കുകയാണ്. അതിനിടെയാണ് ലഡാക്കിലും ചൈനീസ് അതിക്രമം ഉണ്ടായത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ