ബിജെപി അധികാരം പിടിച്ചത് ഇങ്ങനെ; ഐടി സെല്‍ പ്രവര്‍ത്തകന്റെ വെളിപ്പെടുത്തല്‍ ഞെട്ടിക്കുന്നത്

ഒരു മണിക്കൂര്‍ കൊണ്ട് സോഷ്യല്‍ മീഡിയയിലൂടെ രാജ്യത്തെ ക്രമസമാധാനം തകര്‍ക്കാന്‍ ബിജെപിക്ക് സാധിക്കും. ഹിന്ദു, മുസ്ലീം പേരുകളിലായി ലക്ഷക്കണക്കിന് വ്യാജ പ്രൊഫൈലുകള്‍ നിലവില്‍ ഉണ്ട്
ബിജെപി അധികാരം പിടിച്ചത് ഇങ്ങനെ; ഐടി സെല്‍ പ്രവര്‍ത്തകന്റെ വെളിപ്പെടുത്തല്‍ ഞെട്ടിക്കുന്നത്

ന്യൂഡല്‍ഹി: സമൂഹമാധ്യമങ്ങളിലൂടെ കുപ്രചരണം നടത്തി ബിജെപി രാജ്യത്ത് തെരഞ്ഞടുപ്പില്‍ വിജയിച്ച വെളിപ്പെടുത്തലുമായി മുന്‍ ബിജെപി ഐടി സെല്‍ പ്രവര്‍ത്തകന്‍. സമകാലിക വിഷയങ്ങളില്‍ പഠനം നടത്തി യൂടൂബ് വീഡിയോ പോസ്റ്റ് ചെയ്യുന്ന ധ്രുവ് രതി നടത്തിയ അഭിമുഖത്തിലാണ് മഹാവിര്‍ പ്രസാദ് എന്ന ഐടി സെല്‍ ഉദ്യോഗസ്ഥന്റെ വെളിപ്പെടുത്തലുകള്‍ ഞെ്ട്ടിപ്പിക്കുന്നതാണ്. 

ബിജെപിക്കെതിരായി ശബ്ദിക്കുന്ന രാഷ്ട്രീയ പ്രവര്‍ത്തകരെയും, മാധ്യമങ്ങളെയും ട്രോളുക എന്നതാണ് ഐടി സെല്ലിന്റെ പ്രധാന ലക്ഷ്യം. അത്തരം ഫേസ്ബുക്ക് പേജുകളെ റിപ്പോര്‍ട്ട് ചെയ്ത് പൂട്ടിക്കുക. സെല്ലിന്റെ നട്ടെല്ലായി പ്രവര്‍ത്തിക്കുന്ന സൂപ്പര്‍ 150 ആണ് ട്രോളുകള്‍ നിര്‍മ്മിക്കുന്നത്. തങ്ങളുടെ ജോലി എന്നത് ലക്ഷങ്ങള്‍ ലൈക്കുകളുള്ള അനേകം ബിജെപി സ്‌പോണ്‍സേര്‍ഡ് പേജുകളില്‍ ഇത് ഷെയര്‍ ചെയ്യുക എന്നതാണെന്നും മഹാവീര്‍ പറയുന്നു.

ഏതൊരു വിഷയത്തെയും വര്‍ഗീയവത്കരിച്ച് സോഷ്യല്‍ മീഡിയയില്‍ പ്രചരിപ്പിക്കുക, ഇത്തരം പോസ്റ്റുകളെ ഇന്‍സിസ്റ്റ് പോസ്റ്റ്.കോം, ന്യൂസ് ട്രെന്‍ഡ്.ന്യൂസ്, വൈറല്‍ ഇന്‍ ഇന്ത്യ.ഇന്‍ വഴി ജനങ്ങളിലേക്ക് എത്തിച്ചതായും ഇത്തരം സൈറ്റുകളില്‍ ഒരു ദിവസം 4 കോടി സന്ദര്‍ശരെത്തുന്നതായും അദ്ദേഹം പറയുന്നു. ഒരോ ഐടി സെല്‍ പ്രവര്‍ത്തകനും ഒരു ലാപ്‌ടോപ്പും, പത്ത് മൊബൈല്‍ ഫോണുകളും നല്‍കിയിരുന്നു. ഇതു ഉപയോഗിച്ച് വാട്‌സാപ്പിലൂടെയും, ഫേസ്ബുക്കിലൂടെയും വ്യാജ, വര്‍ഗീയ ചുവയുള്ള വാര്‍ത്തകള്‍ പ്രചരിപ്പിക്കുക എന്നതാണ് പ്രധാന ടാസ്‌ക്. ഒരോ മൊബൈലിലും അടങ്ങുന്ന 300 വാട്‌സാപ്പ് ഗ്രൂപ്പുകളിലേക്ക് തങ്ങള്‍ നിര്‍മ്മിക്കുന്ന വാര്‍ത്തകള്‍ ഷെയര്‍ ചെയ്തിരുന്നതായും മഹാവീര്‍ പറയുന്നു
2012 ല്‍ നിധിന്‍ ഖഡ്കരി ഐടി സെല്‍ അധ്യക്ഷനായിരുന്ന അവസരത്തിലാണ് ഐടി സെല്ലില്‍ മഹാവീര്‍ എത്തുന്നത്. സോഷ്യല്‍ മീഡിയ കൈകാര്യം ചെയ്യുന്നതിലുള്ള പ്രാവീണ്യം കണ്ട് ബിജെപി പ്രവര്‍ത്തകര്‍ തന്നെയാണ് എന്നെ ഐടി സെല്ലിലേക്ക് ക്ഷണിച്ചത്‌. അവിടെ 2015 വരെ തുടര്‍ന്നെന്നും അദ്ദേഹം പറയുന്നു.രാജ്യത്തെ വര്‍ഗീയമായി ഭിന്നിപ്പിക്കുക എന്നതാണ് ബിജെപി ഐടി സെല്ലിന്റെ ലക്ഷ്യം. ആര്‍എസ്എസ് പശ്ചാത്തലമുള്ള ബിജെപി പ്രവര്‍ത്തകര്‍ക്ക് മോദിയെ മാറ്റി ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിനെ പ്രധാനമന്ത്രിയാക്കു എന്നതാണ് ആത്യന്തിക ലക്ഷ്യം. ഇതിനായുള്ള ശ്രമങ്ങള്‍ നേരത്തെ തുടങ്ങിയിരുന്നു എന്നാല്‍ മോദിയെ ബിജെപിയുടെ മുഖമാക്കാന്‍ പിആര്‍ കമ്പിനികള്‍ക്ക് ടെന്‍ഡര്‍ നല്‍കി കഴിഞ്ഞതിനാല്‍ യോഗിക്ക് അവസരം ലഭിച്ചില്ലെന്നും രാജ്യത്തെ കാവിവത്കരിച്ച് മനുസ്മൃതിക്ക് ആധാരമായി ഭരണഘടന തിരുത്തുക എന്ന ലക്ഷ്യവും ഇവര്‍ മുന്നില്‍ ഉണ്ടെന്നും അദ്ദേഹം പറയുന്നു.

ഫേസ്ബുക്കില്‍ ബിജെപിക്കെതിരെ ഒന്നും ചെയ്യാന്‍ സാധിക്കില്ല. അത്രമേല്‍ സ്വാധീനം ഇതിനോടകം ഐടി സെല്‍ മുഖേന ഫേസ്ബുക്കില്‍ ബിജെപി നേടി കഴിഞ്ഞു. ഒരു മണിക്കൂര്‍ കൊണ്ട് സോഷ്യല്‍ മീഡിയയിലൂടെ രാജ്യത്തെ ക്രമസമാധാനം തകര്‍ക്കാന്‍ ബിജെപിക്ക് സാധിക്കും. ഹിന്ദു, മുസ്ലീം പേരുകളിലായി ലക്ഷക്കണക്കിന് വ്യാജ പ്രൊഫൈലുകള്‍ നിലവില്‍ ഉണ്ട്. ലക്ഷകണക്കിന് ലൈക്കുകളുള്ള മഹാപുരുഷന്മാരുടെയും, ഇന്ത്യന്‍ ആര്‍മി ആരാധകരുടെയും നിരവധി പേജുകള്‍ നിലവില്‍ ഉണ്ട്. ഇന്ത്യന്‍ ആര്‍മി ആരാധകര്‍ക്കായി തന്നെ വിവിധ പേരുകളില്‍ 500ഓളം പേജുകളുണ്ട്. ഈ പേജുകള്‍ക്കെല്ലാം തന്നെ ലക്ഷങ്ങള്‍ ലൈക്കുകളുമുണ്ട്. ഇത് വഴിയാണ് ബിജെപി തങ്ങളുടെ വ്യാജ വാര്‍ത്തകളും, മുസ്ലീം വിദ്വേഷവുമെല്ലാം രാജ്യത്ത് പ്രചരിപ്പിക്കുന്നത്.മുസ്ലീം പേരുകളുള്ള വ്യാജ അക്കൗണ്ടുകള്‍ നിര്‍മ്മിച്ച് ഖുറാന്‍ സൂക്തങ്ങള്‍ ഷെയര്‍ ചെയ്യുന്നു. മറ്റ് പോസ്റ്റുകളില്‍ പോയി അള്ളാഹു അക്ബര്‍, അമീന്‍ എന്ന് മറ്റും കമന്റ് ചെയ്ത് ആധികാരീകത സൃഷ്ടിക്കാന്‍ ശ്രമിക്കും. പിന്നീട് ബിജെപിയെ പിന്തുണയ്ക്കുന്ന പോസ്റ്റുകള്‍ ഷെയര്‍ ചെയ്യും.


ബിജെപി പശ്ചാത്തലമുള്ളയാണ് താനെങ്കിലും ഒരു പരിധി കഴിഞ്ഞപ്പോള്‍ ചെയ്യുന്ന പ്രവര്‍ത്തിയില്‍ മനസ് മടുത്തിട്ടാണെന്നും ആ ജോലി  ചെയ്യുന്നത് തെറ്റാണെന്ന ബോധ്യമുണ്ടായപ്പോഴാണ് ജോലി ഉപേക്ഷിച്ചത്.പ്രതിദിനം 1000 രൂപ ലഭിക്കുമായിരുന്നു. അമിത് മാളവ്യ, വികാസ് പാണ്ഡെ പോലുള്ള ബിജെപി ദേശീയ ഐടി സെല്‍ പ്രവര്‍ത്തകര്‍ക്ക് ലക്ഷങ്ങളാണ് നല്‍കുന്നത്. രാജ്യത്തെ തൊഴിലില്ലായ്മ തന്നെയാണ് ഇത്തരം കൂട്ടായ്മകളില്‍ ചെന്ന് പെടാന്‍ കാരണമെന്നും മഹാവീര്‍ പറയുന്നു
 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
X
logo
Samakalika Malayalam
www.samakalikamalayalam.com