ലഖ്‌നൗ: ബിജെപി നേതാവ് ചിന്‍മയാനന്ദിന് എതിരെ ലൈംഗിക അതിക്രമത്തിന് കേസ് കൊടുത്ത നിയമവിദ്യാര്‍ത്ഥിനി അറസ്റ്റില്‍. ഭീഷണിപ്പെടുത്തി പണം തട്ടാന്‍ ശ്രമിച്ചുവെന്ന ചിന്‍മയാനന്ദിന്റെ പരാതിയിലാണ് അന്വേഷണ സംഘം വിദ്യാര്‍ത്ഥിനിയെ അറസ്റ്റ് ചെയ്തിരിക്കുന്നത്. കഴിഞ്ഞ ദിവസം കോടതിയിലേക്ക് പോകുംവഴി പെണ്‍കുട്ടിയെ തടഞ്ഞ പൊലീസ് കസ്റ്റഡിയിലെടുക്കുകയായിരുന്നു. ചോദ്യം ചെയ്യലിന് പിന്നാലെ ഇവരുടെ അറസ്റ്റ് രേഖപ്പെടുത്തി.
ചിന്‍മയാനന്ദിന്റെ പരാതിയുടെ അടിസ്ഥാനത്തില്‍ നേരത്തെ മൂന്നുപേരെ പൊലീസ് അറസ്റ്റ് ചെയ്തിരുന്നു. സഞ്ജയ് സിങ്, സച്ചിന്‍ സിങ്, വിക്രം എന്നിവരാണ് അറസ്റ്റിലായത്. അപകീര്‍ത്തികരമായ വീഡിയോ ദൃശ്യങ്ങള്‍ പുറത്തു വിടുമെന്നും അല്ലെങ്കില്‍ അഞ്ചുകോടി രൂപ നല്‍കണമെന്നും ആവശ്യപ്പെട്ട് അറസ്റ്റിലായവര്‍ ചിന്മയാനന്ദിനു സന്ദേശം അയച്ചിരുന്നെന്ന് പൊലീസ് പറയുന്നു. അന്വേഷണത്തില്‍ വിദ്യാര്‍ഥിനിയും സഞ്ജയ് സിങ്ങും തമ്മില്‍ നിരന്തരം ഫോണില്‍ ബന്ധപ്പെട്ടിരുന്നതായി തെളിഞ്ഞുവെന്നും പൊലീസ് പറഞ്ഞു.
കേസില്‍ അറസ്റ്റ് ഒഴിവാക്കണമെന്നും തനിക്ക് സംരക്ഷണം നല്‍കണം എന്നുമാവശ്യപ്പെട്ട് പെണ്‍കുട്ടി അലഹബാദ് ഹൈക്കോടതിയെ സമീപിച്ചിരുന്നു. എന്നാല്‍ ഹര്‍ജി ഹൈക്കോടതി തള്ളി. പ്രത്യോേക ബെഞ്ചാണ് കേസ് പരിഗണിക്കുന്നത് എന്ന് ചൂണ്ടിക്കാട്ടിയാണ് ഹൈക്കോടതി ഹര്‍ജി തള്ളിയത്. ഇതിന് പിന്നാലെ, പുതിയ ഹര്‍ജിയുമായി ഷാജഹാന്‍പൂരിലെ കോടതിയിലേക്ക് പോകും വഴിയായിരുന്നു പൊലീസ് നടപടി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
