ലോക്‌സഭാ തിരഞ്ഞെടുപ്പിലെ ബിജെപിയുടെ വിജയം പ്രഖ്യാപിച്ചുള്ള പ്രധാനമന്ത്രി നരേന്ദ്ര മോദിയുടെ ട്വീറ്റിനു ഗോൾഡൻ ട്വീറ്റ് പുരസ്കാരം. ഈ വർഷം രാജ്യത്ത് ഏറ്റവുമധികം റീട്വീറ്റ് ചെയ്തതും ലൈക്ക് ലഭിച്ചതും ഈ ട്വീറ്റിനാണ്. 4,21,000 പേർ ലൈക്ക് ചെയ്തിരിക്കുന്ന ട്വീറ്റ് 1,17,700 തവണ റീട്വീറ്റ് ചെയ്യപ്പെട്ടിട്ടുമുണ്ട്.
'സബ്കാ സാഥ്+ സബ്കാ വികാസ്+ സബ്കാ വിശ്വാസ്= വിജയി ഭാരത്' എന്നായിരുന്നു മോദിയുടെ ട്വീറ്റ്. 'നാം ഒന്നിച്ച് വളരുന്നു, ഒന്നിച്ച് പുരോഗതി നേടുന്നു, ശക്തവും എല്ലാവരെയും ഉള്‍ക്കൊള്ളുന്നതുമായ ഇന്ത്യയെ നാം ഒന്നിച്ച് നിര്‍മിക്കും. ഇന്ത്യ ഒരിക്കല്‍ക്കൂടി വിജയിച്ചിരിക്കുന്നു', എന്നും ട്വീറ്റിൽ കുറിച്ചിട്ടുണ്ട് . വിജയി ഭാരത് എന്ന ഹാഷ് ടാഗോടെ 2019 മേയ് 23ന് ആണ് മോദി ഈ ട്വീറ്റ് ചെയ്തത്.
ട്വിറ്റർ പുറത്തുവിട്ട #ThisHappened2019 റിപ്പോർട്ടിലാണ് ഈ വർഷത്തെ ട്വിറ്റർ ട്രെൻഡുകൾ അവതരിപ്പിച്ചത്.
ഇന്ത്യൻ ക്രിക്കറ്റ് ടീം നായകൻ വിരാട് കൊഹ്ലി എം എസ് ധോണിക്ക് ജന്മദിനാശംസകള്‍ നേര്‍ന്നുകൊണ്ട് നടത്തിയ ട്വീറ്റ് ആണ് കായികരംഗത്ത് ഏറ്റവുമധികം റീട്വീറ്റുകൾ നേടി ചർച്ചയായത്. ഇരുവരും ഒന്നിച്ചുള്ള ചിത്രത്തോടൊപ്പം 'മഹി ഭായ്' എന്ന് അഭിസംബോധന ചെയ്തുകൊണ്ടായിരുന്നു കൊഹ്ലിയുടെ ട്വീറ്റ്. ബിഗിൽ സിനിമയെക്കുറിച്ചുള്ള നടൻ വിജയ്‌യുടെ ട്വീറ്റാണ് എന്റർടെയിൻമെന്റ് രംഗത്ത് മുന്നിലുള്ളത്.
ട്വിറ്ററിൽ ഏറ്റവുമധികം ചർച്ചചെയ്യപ്പെട്ടവരിലും ഒന്നാമത് നരേന്ദ്ര മോദി തന്നെയാണ്. രാഹുൽ ഗാന്ധി, അമിത് ഷാ, അരവിന്ദ് കേജ്‌രിവാൾ, യോഗി ആദിത്യനാഥ് എന്നിവരാണ് ട്വിറ്റർ തിരച്ചിലിൽ മോദിക്ക് പിന്നിലുള്ളത്. സിനിമരംഗത്ത് പുരുഷന്മാരിൽ അമിതാഭ് ബച്ചനും സ്ത്രീകളിൽ സൊനാക്ഷി സിൻഹയുമാണ് ഏറ്റവും ചർച്ച ചെയ്യപ്പെട്ട ട്വിറ്റർ ഹാൻഡിലുകളുടെ ഉടമകൾ. #loksabhaelections2019 എന്ന ഹാഷ് ടാഗ് ആണ് ഈ വർഷം ഏറ്റവുമധികം തവണ ട്വീറ്റ് ചെയ്യപ്പെട്ടത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
