ന്യൂഡല്ഹി: അയോധ്യയിലെ തര്ക്ക ഭൂമി ഹിന്ദുക്കള്ക്കു നല്കാന് സുപ്രീം കോടതി വിധി. പള്ളി പണിയുന്നതിനു മുസ്ലിംകള്ക്കു പകരം ഭൂമി നല്കാന് ചീഫ് ജസ്റ്റിസ് രഞ്ജന് ഗൊഗോയിയുടെ നേതൃത്വത്തിലുള്ള അഞ്ചംഗ ഭരണഘടനാ ബെഞ്ച് വിധിച്ചു.
അയോധ്യയില് ബാബരി മസ്ജിദ് നിലനിന്നിരുന്ന ഭൂമിയില് ഉടമാവകാശം സ്ഥാപിക്കാന് സുന്നി വഖഫ് ബോര്ഡിനായില്ലെന്ന് കോടതി വിലയിരുത്തി. അതേസമയം ബാബരി പള്ളി തകര്ത്തത് നിയമവിരുദ്ധമായ പ്രവൃത്തിയാണ്. പള്ളി പണിയാന് മുസ്ലിംകള്ക്ക് അഞ്ച് ഏക്കര് പകരം ഭൂമി നല്കണം. ഇതിനായി മൂന്നു മാസത്തിനകം കേന്ദ്ര സര്ക്കാര് പദ്ധതി പ്രഖ്യാപിക്കണമെന്നും സുപ്രീം കോടതി നിര്ദേശിച്ചു.
ബാബരി മസ്ജിദ് നിലനിന്നിരുന്ന സ്ഥലത്ത് ഭൂമിക്കടിയില് ക്ഷേത്രാവശിഷ്ടങ്ങള് ഉണ്ടായിരുന്നെന്ന ആര്ക്കിയോളജിക്കല് സര്വേയുടെ റിപ്പോര്ട്ട തള്ളാനാവില്ലെന്ന് കോടതി പറഞ്ഞു. ബാബരി മസ്ജിദ് പണിതത് ഒഴിഞ്ഞുകിടന്ന ഭൂമിയില് അല്ല. ആ കെട്ടിടത്തിന്റെ അടിയിലുണ്ടായിരുന്ന അവഷിഷ്ടങ്ങള് ഇസ്ലാമികമല്ല എന്നതിനു തെളിവുണ്ട്. എന്നാല് ക്ഷേത്രം പൊളിച്ചാണ് പള്ളി പണിതതെന്ന് ആര്ക്കിയോളജിക്കല് സര്വേ കണ്ടെത്തിയിട്ടില്ലെന്ന് കോടതി ചൂണ്ടിക്കാട്ടി.
തര്ക്ക സ്ഥലത്തു തന്നെയാണ് ശ്രീരാമന് ജനിച്ചത് എന്നു ഹിന്ദുക്കള് വിശ്വസിച്ചുവരുന്നതിന് തെളിവുണ്ട്. രാം ചബൂത്ര, സീതാ രസോയി എന്നിവയില് ബ്രിട്ടിഷ് കാലത്തിനു മുമ്പുതന്നെ ഹിന്ദുക്കള് ആരാധാന നടത്തിയിരുന്നതിനും തെളിവുണ്ടെന്നും കോടതി പറഞ്ഞു. എന്നാല് ഭൂമിയുടെ ഉടമാവകാശം സംബന്ധിച്ച കേസില് വിശ്വാസങ്ങളുടെ അടിസ്ഥാനത്തില് മാത്രം തീരുമാനമെടുക്കാനാവില്ലെന്ന് കോടതി അഭിപ്രായപ്പെട്ടു.
തര്ക്കസ്ഥലത്ത് മുസ്ലിംകള് പ്രാര്ഥന നടത്തുമ്പോള് തന്നെ അതിനോടു ചേര്ന്ന സ്ഥലത്ത് ഹിന്ദുക്കള് പ്രാര്ഥന നടത്തിയിരുന്നുവെന്നു വ്യക്തമാണ്. പള്ളി മുസ്ലിംകള് ഉപേക്ഷിച്ചതാണെന്ന വാദം ശരിയല്ല. എന്നാല് പള്ളി നിലനിന്ന സ്ഥലത്തിന്റെ ഉടമസ്ഥാവകാശം തെളയിക്കാന് സുന്നി വഖഫ് ബോര്ഡിനായില്ല.
രാമജന്മ ഭൂമിയെ നിയമ വ്യക്തിത്വമായി അംഗീകരിക്കണമെന്ന നിര്മോഹി അഖാഡയുടെ വാദം കോടതി അംഗീകരിച്ചില്ല. നിര്മോഹി അഖാഡ നല്കിയ ഹര്ജി നിയമപരമായി നിലനില്ക്കില്ലെന്നും ബെഞ്ച് വ്യക്തമാക്കി. ഭൂമിയില് അവകാശവാദം ഉന്നയിച്ച് ഷിയ വഖഫ് ബോര്ഡ് നല്കിയ ഹര്ജി സുപ്രീം കോടതി തള്ളി. 1946ലെ ഫൈസാബാദ് കോടതി വിധിയെ ചോദ്യം ചെയ്താണ് ഷിയാ വഖഫ് ബോര്ഡ് ഹര്ജി നല്കിയിരുന്നത്. വിശ്വാസികളുടെയും ഭക്തരുടെയും വികാരങ്ങള് കൂടി കണക്കിലെടുത്തുകൊണ്ട് സംതുലിതമായി മാത്രമേ കോടതി ഇക്കാര്യത്തില് തീരുമാനമെടുക്കാനാവൂ എന്ന് ബെഞ്ച് അഭിപ്രായപ്പെട്ടു.
40 ദിവസം നീണ്ട വാദം കേള്ക്കലിന് ശേഷമാണ് ചീഫ് ജസ്റ്റിസിനു പുറമേ ജസ്റ്റിസുമാരായ എസ് എ ബോബ്ഡെ, അശോക് ഭൂഷണ്, ഡി വൈ ചന്ദ്രചൂഡ്, എസ് അബ്ദുള് നസീര് എന്നിവരടങ്ങിയ ബെഞ്ച്് കേസില് വിധി പറഞ്ഞത്.
അയോധ്യ വിധിയുമായി ബന്ധപ്പെട്ടു കനത്ത സുരക്ഷയാണ് രാജ്യമെമ്പാടും ഒരുക്കിയിരിക്കുന്നത്. സംസ്ഥാനങ്ങള്ക്കും കേന്ദ്ര ഭരണപ്രദേശങ്ങള്ക്കും കേന്ദ്രസര്ക്കാര് ജാഗ്രതാ നിര്ദേശം നല്കി. പ്രശ്ന ബാധിത മേഖലകളില് പൊലീസിനെ വിന്യസിക്കണമെന്ന് ആഭ്യന്തര മന്ത്രാലയം നിര്ദേശിച്ചു. അനാവശ്യവും നിരുത്തരവാദപരവുമായ പ്രസ്താവനകള് നടത്തരുതെന്ന് പ്രധാനമന്ത്രി നരേന്ദ്ര മോദി കേന്ദ്രമന്ത്രിമാര്ക്കു കര്ശന നിര്ദേശം നല്കി.
യുപിയിലേക്ക് 4,000 അര്ധസൈനികരെ അയച്ചതായും ആഭ്യന്തരമന്ത്രാലയം അറിയിച്ചു. റെയില്വേ മന്ത്രാലയം എല്ലാ സോണുകളിലേക്കും ഏഴുപേജുള്ള സുരക്ഷാ മുന്കരുതല് നിര്ദേശങ്ങള് നല്കി. സ്റ്റേഷനുകള്, പ്ലാറ്റ്ഫോമുകള്, തുരങ്കങ്ങള്, പാര്ക്കിങ് സ്ഥലങ്ങള് എന്നിവിടങ്ങളില് നിരന്തര പരിശോധന നടത്തും. മെട്രോ നഗരങ്ങളിലടക്കം 78 പ്രധാന റെയില്വേ സ്റ്റേഷനുകളില് കൂടുതല് കാവലൊരുക്കിയിട്ടുണ്ട്.
റെയില്വേ സുരക്ഷാസേനാംഗങ്ങളുടെ അവധി റദ്ദാക്കി. ട്രെയിനുകളുടെ സുരക്ഷയ്ക്ക് കൂടുതല്പേരെ വിന്യസിച്ചു. സ്കാനറുകള്, സിസിടിവി ക്യാമറകള് എന്നിവയുടെ തകരാറുകള് അടിയന്തരമായി തീര്ക്കാന് ആവശ്യപ്പെട്ടിട്ടുണ്ട്. പ്രശ്നസാധ്യതയുള്ള മേഖലകളിലും സ്ഫോടക വസ്തുക്കള് സൂക്ഷിക്കാന് സാധ്യതയുള്ള ഇടങ്ങളിലും റെയില്വേ നിരീക്ഷണമേര്പ്പെടുത്തി.
ആരാധനാലയങ്ങളിലെ സുരക്ഷ കൂട്ടി. അയോധ്യ ഉള്പ്പെടുന്ന മേഖലയില് സമൂഹമാധ്യമ ഉപയോഗത്തിനടക്കം ഡിസംബര് 28 വരെ കര്ശന നിയന്ത്രണങ്ങളുണ്ട്. അയോധ്യയ്ക്ക് സമീപം അംബേദ്ക്കര് നഗറില് 8 കോളജുകളില് യുപി സര്ക്കാര് താല്ക്കാലിക ജയിലുകള് സജ്ജമാക്കി. അയോധ്യയില് ഡിസംബര് 10 വരെ നിരോധനാജ്ഞ തുടരും. ക്ഷേത്ര നിര്മാണത്തിനായി വിഎച്ച്പി 1990 മുതല് തുടങ്ങിയ കല്പണികള് നിര്ത്തിവ.ച്ചു. നാട്ടുകാരായ 16,000 സന്നദ്ധ പ്രവര്ത്തകരെ ഉള്പ്പെടുത്തി പൊലീസ് സുരക്ഷാസംഘം സജ്ജമാക്കിയിട്ടുണ്ട്.
നാള്വഴികള്
1528ല് നിര്മ്മിക്കപ്പെട്ടുവെന്ന് കരുതുന്ന ബാബറി മസ്ജിദ് രാമജന്മഭൂമിയാണെന്ന അവകാശവാദം ഉയരുന്നത് 1850ഓടെ.
1885 ജനുവരി 29 തര്ക്കം ആദ്യമായി കോടതികയറി. മഹന്ത് രഘുബര്ദാസ് തര്ക്കഭൂമിയില് ക്ഷേത്രം പണിയണമെന്നാവശ്യപ്പെട്ട് നല്കിയ ഹര്ജി ഫൈസാബാദ് സബ്കോടതി തള്ളി. ഇതിനെതിരെ നല്കിയ അപ്പീലുകള് 1886 മാര്ച്ച് 18ന് ജില്ലാകോടതിയും നവംബര് 1ന് ജുഡീഷ്യല് കമ്മീഷണറും തള്ളിയതോടെ ബ്രിട്ടീഷ് കാലത്തെ നിയമപോരാട്ടം അവസാനിച്ചു.
1949 ഓഗസ്റ്റ് 22 പള്ളിയില് രാമവിഗ്രഹം പ്രതിഷ്ഠിക്കപ്പെട്ടു. 1949 ഡിസംബര് 29 തര്ക്കഭൂമി ജില്ലാ മജിസ്ട്രേറ്റ് ജപ്തി ചെയ്തു. ഇതിനെതിരെ 1950 ജനുവരി 16ന് ഗോപാല് സിങ് വിഷാരദെന്ന ശ്രീരാമ ഭക്തന് ഫൈസാബാദ് കോടതിയില് ഹര്ജി നല്കി. അയോധ്യ തര്ക്കത്തില് സ്വതന്ത്ര ഇന്ത്യയിലെ നിയമപോരാട്ടം ഇവിടെ തുടങ്ങുന്നു. 1959ല് സുന്നി വഖഫ് ബോര്ഡും 1961ല് നിര്മോഹി അഖാഡയും ഹര്ജി നല്കി.
1986 ജനുവരി 31, പള്ളി ഹിന്ദുക്കള്ക്കായി തുറന്നുകൊടുക്കാന് ഫൈസാബാദ് മജിസ്ട്രേറ്റ് കോടതി ഉത്തരവ്. തുടര്ന്നുണ്ടായ സംഭവ വികാസങ്ങള് അവസാനിച്ചത് 1992ലെ ഡിസംബര് ആറിന് ബാബറി മസ്ജിദിന്റെ തകര്ക്കലില്.
1993 ജനുവരി 7, തര്ക്കഭൂമി ഏറ്റെടുത്ത് കേന്ദ്ര സര്ക്കാര് നിയമം. തര്ക്കഭൂമിയുടെ കാര്യത്തില് തീര്പ്പുണ്ടാക്കാന് സുപ്രീംകോടതിക്ക് രാഷ്ട്രപതിയുടെ റഫറന്സും.
1994 ഒക്ടോബര് 24, റഫറന്സിന് മറുപടി നല്കാന് വിസമ്മതിച്ച് സുപ്രീംകോടതി വിധി. വിഷയം അലഹബാദ് ഹൈക്കോടതിയിലേക്ക്. 2010 സെപ്റ്റംബര് 30, തര്ക്കഭൂമി മൂന്നായി വിഭജിക്കാന് ഹൈക്കോടതി വിധി.
2010 മെയ് 9 വിധിക്ക് സുപ്രീംകോടതി സ്റ്റേ. 2019 ജനുവരി 08 ഹൈക്കോടതി വിധിക്കെതിരായ അപ്പീലുകള് ഭരണഘടന ബെഞ്ചിന്.
2019 മാര്ച്ച് 08 സമവായ ചര്ച്ചക്ക് സുപ്രീംകോടതി ഉത്തരവ്. ചര്ച്ച പരാജയപ്പെട്ടതോടെ 2019 ഓഗസ്റ്റ് 06 ഭരണഘടന സുപ്രീംകോടതിയില് അന്തിമവാദം.
2019 ഒക്ടോബര് 16 40 ദിവസത്തെ വാദംത്തിന് ശേഷം ഹര്ജികള് വിധി പറയാന് മാറ്റി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ