ന്യൂഡല്‍ഹി: എഐസിസി മുന്‍ ജനറല്‍ സെക്രട്ടറി ജനാര്‍ദന്‍ ദ്വിവേദിയുടെ മകന്‍ ബിജെപിയില്‍ ചേര്‍ന്നു. കോണ്‍ഗ്രസിന്റെ പൊതുപരിപാടികളില്‍ നിന്ന് വിട്ടുനില്‍ക്കുന്ന ജനാര്‍ദന്‍ ദ്വിവേദി, ബിജെപിയില്‍ ചേരുമെന്ന അഭ്യൂഹങ്ങള്‍ കഴിഞ്ഞ കുറെ നാളുകളായി ഉയര്‍ന്നു കേള്‍ക്കുന്നതിനിടെയാണ് മകന്‍ സമീര്‍ ദ്വിവേദി ബിജെപിയില്‍ ചേര്‍്ന്നത്.
കോണ്‍ഗ്രസ് പാര്‍ട്ടിയിലെ തലമുതിര്‍ന്ന അംഗമായ ജനാര്‍ദന്‍ ദ്വിവേദി കഴിഞ്ഞ ലോക്‌സഭാ തിരഞ്ഞെടുപ്പില്‍ കോണ്‍ഗ്രസ് കനത്ത പരാജയം നേരിട്ടതിനെ തുടര്‍ന്ന് എഐസിസി ജനറല്‍ സെക്രട്ടറി സ്ഥാനം രാജിവച്ചിരുന്നു. പിന്നീട് കോണ്‍ഗ്രസിന്റെ പൊതുപരിപാടികളില്‍ നിന്നെല്ലാം വിട്ടുനില്‍ക്കുകയും ചെയ്തു. ബിജെപിയിലേക്കു പോകുന്നു എന്ന അഭ്യൂഹങ്ങള്‍ക്കിടെ ഡിസംബറില്‍ ആര്‍എസ്എസ് വേദിയിലും ജനാര്‍ദന്‍ ദ്വിവേദി പ്രത്യക്ഷപ്പെട്ടിരുന്നു. ഭഗവദ്ഗീതയെ ആധാരമാക്കി ഡല്‍ഹിയില്‍ സംഘടിപ്പിച്ച ചടങ്ങിലാണ് ആര്‍എസ്എസ് മേധാവി മോഹന്‍ ഭാഗവതിനൊപ്പം ദ്വിവേദി വേദി പങ്കിട്ടത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
