മുംബൈ: ക്രിമിനല് പശ്ചാത്തലമുളള പ്രായപൂര്ത്തിയാവാത്ത കുട്ടികളെ റോഡിലൂടെ അര്ദ്ധനഗ്നരായി നടത്തിച്ച പൊലീസ് നടപടിയില് പ്രതിഷേധം. തടിച്ചുകൂടിയ ജനങ്ങള് പ്രായപൂര്ത്തിയാവാത്ത കുട്ടികളെ നോക്കി പരിഹസിക്കുകയും ദൃശ്യങ്ങള് പകര്ത്താന് ശ്രമിക്കുകയും ചെയ്യുന്നതിന്റെ വീഡിയോ വ്യാപകമായാണ് പ്രചരിക്കുന്നത്.
മഹാരാഷ്ട്ര നാഗ്പൂരിലെ ജരിപത്കയിലെ തിരക്കുളള റോഡിലൂടെയാണ് കുട്ടികളെ റോന്തുചുറ്റിച്ചത്. ഇതിനെതിരെ സോഷ്യല്മീഡിയയില് അടക്കം വ്യാപക പ്രതിഷേധമാണ് ഉയരുന്നത്. അടിവസ്ത്രം മാത്രമായിരുന്നു പ്രായപൂര്ത്തിയാവാത്ത കുട്ടികളുടെ വേഷം. കൈ കയറു കൊണ്ട് കെട്ടിയ നിലയിലായിരുന്നു. അതിനിടെ ചില പൊലീസ് ഉദ്യോഗസ്ഥര് ചൂരല് കൊണ്ട് അടിക്കുന്നതും ദൃശ്യങ്ങളില് വ്യക്തമാണ്. വഴിയാത്രക്കാര് പകര്ത്തിയ വീഡിയോയാണ് വ്യാപകമായി പ്രചരിക്കുന്നത്.
സംഭവം അപലപനീമാണെന്ന് പറഞ്ഞ നാഗ്പൂര് പൊലീസ് കമ്മീഷണര് അമിതേഷ് കുമാര്, അന്വേഷണത്തിന് ഉത്തരവിട്ടു. ബാറില് ഉണ്ടായ അടിപിടിയിലും പണം തട്ടിയെടുത്ത കേസിലുമുളള പ്രതികളെയാണ് റോഡിലൂടെ നടത്തിച്ചത്. ബാറില് വാള് ഉള്പ്പെടെ മാരകായുധങ്ങളുമായി എത്തിയ കൗമാരക്കാരും ജീവനക്കാരും തമ്മിലുളള ഏറ്റുമുട്ടല് അക്രമാസക്തമാകുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ