ന്യൂഡല്ഹി: കോവിഡ് കാലത്ത് ജനങ്ങള്ക്ക് ആശ്വാസം പകര്ന്ന് കേന്ദ്രസര്ക്കാര് പ്രഖ്യാപിച്ച ഗരീബ് കല്യാണ് അന്നയോജന പദ്ധതി നീട്ടിയേക്കില്ലെന്ന് റിപ്പോര്ട്ട്. പദ്ധതി നീട്ടുന്നതുമായി ബന്ധപ്പെട്ട് ഒരു നിര്ദേശവും സര്ക്കാരിന്റെ മുന്നില് ഇല്ലെന്ന് കേന്ദ്ര ഭക്ഷ്യ സെക്രട്ടറി സുധാന്ഷു പാണ്ഡെയെ ഉദ്ധരിച്ച് വാര്ത്താ ഏജന്സിയായ യുഎന്ഐ റിപ്പോര്ട്ട് ചെയ്തു.
ഗരീബ് കല്യാണ് അന്നയോജന
കോവിഡ് വ്യാപനത്തിന്റെ തുടക്കത്തിലാണ് പാവപ്പെട്ടവര്ക്ക് ഭക്ഷ്യധാന്യം ഉറപ്പാക്കാന് കേന്ദ്രസര്ക്കാര് പ്രധാനമന്ത്രി ഗരീബ് കല്യാണ് അന്നയോജന പദ്ധതി പ്രഖ്യാപിച്ചത്. മാസം അഞ്ചുകിലോ വീതം ഭക്ഷ്യധാന്യം പാവപ്പെട്ടവരുടെ ഇടയില് സൗജന്യമായി വിതരണം ചെയ്യുന്നതാണ് പദ്ധതി. 80 കോടി ഗുണഭോക്താക്കള്ക്ക് ഗുണം ചെയ്യുന്ന പദ്ധതി വിവിധ ഘട്ടങ്ങളിലായി നവംബര് 30 വരെ നീട്ടിയിരുന്നു.
തുടര്ന്നും നീട്ടുമോ എന്നതിനെ സംബന്ധിച്ച ചര്ച്ചകള് നടക്കുന്നതിനിടെയാണ്, കേന്ദ്ര ഭക്ഷ്യ സെക്രട്ടറിയുടെ വാക്കുകള് പുറത്തുവന്നത്. പദ്ധതി നീട്ടുന്നതുമായി ബന്ധപ്പെട്ട് ഒരു നിര്ദേശവും സര്ക്കാരിന്റെ മുന്നില് ഇല്ല. കോവിഡിനെ തുടര്ന്ന് തളര്ച്ച നേരിട്ട സമ്പദ് വ്യവസ്ഥ മടങ്ങിവരവിന്റെ പാതയിലാണ്. ഭക്ഷ്യധാന്യ ശേഖരം ഉയര്ന്നതായും ഭക്ഷ്യസെക്രട്ടറി അറിയിച്ചു.കോവിഡ് രണ്ടാം തരംഗം രൂക്ഷമായ ഘട്ടത്തിലാണ് പദ്ധതി നവംബര് 30 വരെ നീട്ടിയതായി പ്രധാനമന്ത്രി നരേന്ദ്രമോദി അറിയിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ