ലഖ്‌നൗ: പൊലീസുകാരനായ അമ്മയിയച്ഛൻ വനിതാ കോൺസ്റ്റബിളിനെ പീഡിപ്പിച്ചെന്ന് പരാതി. സംഭവത്തിന് പിന്നാലെ യുവതിയുടെ ഭർത്താവ് ഇവരെ മുത്തലാഖ് ചൊല്ലി. ആർപിഎഫ് ഉദ്യോഗസ്ഥനായ നസീർ അഹമ്മദിനെതിരെയാണ് ആരോപണം.
മീററ്റിലെ പൊലീസ് സ്റ്റേഷനിലാണ് ഇരയായ കോൺസ്റ്റബിൾ ജോലി ചെയ്യുന്നത്. ബുധനാഴ്ച രാത്രിയാണ് പരാതിക്കാസ്പദമായ സംഭവം നടന്നതെന്നും ഇക്കാര്യം പുറത്തുപറഞ്ഞാൽ കൊല്ലുമെന്ന് അമ്മായിയച്ഛൻ ഭീഷണിപ്പെടുത്തിയെന്നും യുവതി പറഞ്ഞു. നടന്നകാര്യങ്ങൾ പൊലീസുകാരനായ ഭർത്താവ് ആബിദിനോട് തുറന്നുപറഞ്ഞെങ്കിലും സഹായിക്കുന്നതിന് പകരം മുത്തലാഖ് ചൊല്ലുകയായിരുന്നു.
മൂന്ന് വർഷം മുമ്പു വിവാഹിതയായ തനിക്ക് ഇപ്പോഴും സ്ത്രീധനത്തിന്റെ പേരിൽ ഭർതൃവീട്ടിൽ നിന്ന് പീഢനം നേരിടേണ്ടിവരാറുണ്ടെന്നും ഭർത്താവിന്റെ മാതാപിതാക്കൾ ശാരീരികമായി ഉപദ്രവിക്കാറുണ്ടെന്നും യുവതി പറഞ്ഞു. നസീറിനും ആബിദിനുമെതിരെ കേസെടുത്തതായി പൊലീസ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
