ഗുവഹാത്തി: 2024ലെ ലോക്സഭാ തെരഞ്ഞുടപ്പില് തുടര്ച്ചയായ മൂന്നാം തവണയും നരേന്ദ്രമോദി പ്രധാനമന്ത്രിയാകുമെന്ന് ബിജെപി നേതാവും കേന്ദ്ര ആഭ്യന്തരമന്ത്രിയുമായ അമിത് ഷാ. പ്രതിപക്ഷമായ കോണ്ഗ്രസിന് ലോക്സഭയില് നിലവിലെ സീറ്റുപോലും ഉറപ്പിക്കാന് കഴിയില്ലെന്നും അമിത് ഷാ അവകാശപ്പെട്ടു. അസമില് പൊതുയോഗത്തില് സംസാരിക്കുകയായിരുന്നു അദ്ദേഹം. കോണ്ഗ്രസിന് 'നിഷേധാത്മക മനോഭാവ'മാണെന്നും പുതിയ പാര്ലമെന്റ് മന്ദിരത്തിന്റെ ഉദ്ഘാടനം ബഹിഷ്കരിച്ച് രാഷ്ട്രീയം കളിക്കുകയാണെന്നും അദ്ദേഹം ആരോപിച്ചു.
'അടുത്ത തെരഞ്ഞെടുപ്പില് 300-ലധികം സീറ്റുകളോടെ നരേന്ദ്ര മോദി വീണ്ടും പ്രധാനമന്ത്രിയാകും. പ്രതിപക്ഷ പദവി നഷ്ടമായതിനാല് ലോക്സഭയില് ഇപ്പോഴുള്ള സീറ്റുകളുടെ എണ്ണം പോലും ഉറപ്പിക്കാന് കോണ്ഗ്രസിന് കഴിയില്ല. നിഷേധാത്മക നിലപാടാണ് കോണ്ഗ്രസിനുള്ളത്. പുതിയ പാര്ലമെന്റ് മന്ദിരം മേയ് 28ന് പ്രധാനമന്ത്രി ഉദ്ഘാടനം ചെയ്യും. എന്നാല് രാഷ്ട്രപതി ഉദ്ഘാടനം ചെയ്യണമെന്ന ന്യായം പറഞ്ഞ് കോണ്ഗ്രസ് അത് ബഹിഷ്കരിച്ച് രാഷ്ട്രീയം കളിക്കുകയാണ്'- അമിത് ഷാ പറഞ്ഞു.
കോണ്ഗ്രസിലും പ്രതിപക്ഷം ഭരിക്കുന്ന സംസ്ഥാനങ്ങളിലും ഗവര്ണര്മാര്ക്ക് പകരം മുഖ്യമന്ത്രിമാരും സോണിയ ഗാന്ധി, രാഹുല് ഗാന്ധി തുടങ്ങിയ കോണ്ഗ്രസ് നേതാക്കളും ചേര്ന്ന് പുതിയ നിയമസഭാ മന്ദിരങ്ങള്ക്ക് തറക്കല്ലിട്ടിരുന്നു. പ്രധാനമന്ത്രിയെ മാനിക്കാതിരിക്കുന്നത് ജനവിധിയെ അപമാനിക്കുന്നതിന് തുല്യമാണ്.മോദിയെ പാര്ലമെന്റിനുള്ളില് സംസാരിക്കാന് കോണ്ഗ്രസ് അനുവദിക്കുന്നില്ലെന്നും ഇന്ത്യന് ജനത മോദിക്ക് സംസാരിക്കാനുള്ള അധികാരം നല്കിയിട്ടുണ്ടെന്നും അമിത് ഷാ പറഞ്ഞു.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ