ഡ്രോണ്‍ പറത്തി, അടങ്ങിയ അരിക്കൊമ്പന്‍ വീണ്ടും വിരണ്ടോടി; യൂട്യൂബര്‍ അറസ്റ്റില്‍
By സമകാലികമലയാളം ഡെസ്ക് | Published: 27th May 2023 06:16 PM |
Last Updated: 27th May 2023 06:16 PM | A+A A- |
ടെലിവിഷൻ ദൃശ്യം
കമ്പം: ഡ്രോണ്‍ ഉപയോഗിച്ച് അരിക്കൊമ്പന്റെ ആകാശദൃശ്യം പറത്തിയ യൂട്യൂബര്‍ അറസ്റ്റില്‍. ചിന്നമന്നൂര്‍ സ്വദേശിയാണ് പിടിയിലായത്. ഡ്രോണ്‍ പറത്തിയതിനെ തുടര്‍ന്നാണ് ആന പുളിമരത്തോട്ടത്തില്‍നിന്ന് പുറത്തിറങ്ങിയത്. പുളിമരത്തോട്ടത്തില്‍വച്ച് മയക്കുവെടിവച്ച് അരിക്കൊമ്പനെ പിടികൂടാനായിരുന്നു തമിഴ്‌നാട് വനംവകുപ്പിന്റെ പദ്ധതി. ഇതാണ് പാളിയത്.
അരിക്കൊമ്പനെ മയക്കുവെടിവച്ചു പിടികൂടാന്‍ തമിഴ്‌നാട് സര്‍ക്കാര്‍ ഉത്തരവിറക്കിയിരുന്നു. ആനയെ മേഘമല കടുവാസങ്കേതത്തിനുള്ളില്‍ വിടാനാണ് ഉത്തരവ്. ദൗത്യത്തിനായി ആനമലയില്‍നിന്നു മൂന്നു കുങ്കിയാനകളെ എത്തിക്കും. കമ്പം മേഖലയില്‍ അതീവജാഗ്രത നിര്‍ദേശമുണ്ട്. കമ്പം ടൗണില്‍ നിരോധനാജ്ഞ പ്രഖ്യാപിച്ചു. ഇതു ലംഘിച്ച 20 പേര്‍ക്കെതിരെ കേസെടുത്തു. ജനം പുറത്തിറങ്ങരുതെന്നു നിര്‍ദേശം നല്‍കി. കമ്പംമേട്ട് റൂട്ടില്‍ ഗതാഗതനിയന്ത്രണം ഏര്‍പ്പെടുത്തി.
ആന നാട്ടിലിറങ്ങാതിരിക്കാന്‍ വനംവകുപ്പ് നടപടി സ്വീകരിക്കുന്നുണ്ട്. പടക്കം പൊട്ടിച്ചും ആകാശത്തേയ്ക്കു വെടിവച്ചു ആനയെ അകറ്റാനാണ് ശ്രമം. ആനയെ പിടികൂടുന്നത് സംബന്ധിച്ച് തമിഴ്‌നാട് മുഖ്യമന്ത്രിയും വനംമന്ത്രിയും തമ്മില്‍ ആശയവിനിമയം നടത്തി. തേനി എംഎല്‍എയുമായും ഇരുവരും ചര്‍ച്ച നടത്തുന്നുണ്ട്. ആനയെ പിടികൂടാന്‍ എല്ലാ വകുപ്പുകളും സഹകരിക്കണമെന്നും ജനങ്ങളെ ബുദ്ധിമുട്ടിക്കാതെ ആനയെ മാറ്റണമെന്നും മുഖ്യമന്ത്രി ആവശ്യപ്പെട്ടു.
ഇന്നു രാവിലെ കമ്പം ടൗണിലിറങ്ങിയ അരിക്കൊമ്പന്‍ ഭീതി സൃഷ്ടിച്ച് നാശനഷ്ടങ്ങള്‍ വരുത്തിയിരുന്നു. ഓട്ടോറിക്ഷയും ബൈക്കും ഉള്‍പ്പെടെ തകര്‍ത്ത ആന, ആളുകളെ വിരട്ടിയോടിച്ചു. ടൗണിലെ പ്രധാന റോഡുകളിലൊന്നിലൂടെ ആളുകളെ ഓടിക്കുന്ന അരിക്കൊമ്പന്റെ ദൃശ്യം പുറത്തായിരുന്നു. അരിക്കൊമ്പന്റെ പരാക്രമം ജനജീവിതത്തെ ബാധിച്ച സാഹചര്യത്തിലാണ് മയക്കുവെടി വയ്ക്കാനുള്ള തീരുമാനം.
ഈ വാര്‍ത്ത കൂടി വായിക്കൂ
കമ്പത്തെ വിറപ്പിച്ച് അരിക്കൊമ്പന്‍; തമിഴ്‌നാടിന്റെ ദൗത്യം നാളെ; കമ്പത്ത് നിരോധനാജ്ഞ; വീഡിയോ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
