തിരുവനന്തപുരം: എടിഎമ്മിൽ നിന്നും കാർഡ് ഇല്ലാതെ പണം പിൻവലിക്കാനുള്ള സംവിധാനവുമായി എസ്ബിഐ. എസ്ബിഐയുടെ ഡിജിറ്റൽ ബാങ്കിങ് പ്ലാറ്റ്ഫോമായ യോനോ എസ്ബിഐ വഴിയാണ് പുതിയ സംവിധാനം അവതരിപ്പിച്ചിരിക്കുന്നത്. ഈ സേവനം ലഭ്യമാക്കുന്ന രാജ്യത്തെ ആദ്യത്തെ ബാങ്കാണ് സ്റ്റേറ്റ് ബാങ്ക് ഓഫ് ഇന്ത്യ.
യോനോ കാഷ് എന്ന പുതിയ സംവിധാനം എസ്ബിഐയുടെ 16,500 ൽ അധികം എടിഎമ്മുകളിൽ ലഭിക്കും. ഈ സംവിധാനവുമായി ബന്ധിപ്പിച്ചിരിക്കുന്ന എടിഎമ്മുകളെ യോനോ കാഷ് പോയിന്റ് എന്നാണ് അറിയപ്പെടുക. ഇതുവഴി കാർഡില്ലാതെ പണം പിൻവലിക്കാനാകും. എടിഎം കാർഡുകൾ എടിഎം മെഷീനിൽ ഉപയോഗിക്കുമ്പോൾ തട്ടിപ്പുകൾക്കിരയാകുന്ന സംഭവം വർധിച്ചതോടെ, ഇതിനുള്ള സാധ്യത ഇല്ലാതാക്കുക ലക്ഷ്യമിട്ടു കൂടിയാണ് പുതിയ സംവിധാനം അവതരിപ്പിച്ചിട്ടുള്ളത്.
സ്കിമ്മിംഗ്, ക്ലോണിംഗ് തട്ടിപ്പുകൾക്കുള്ള സാധ്യത ഇല്ലാതാക്കുന്നവെന്നതിനു പുറമെ രണ്ട് ഒതന്റിക്കേഷനിലൂടെ സുരക്ഷിതമാക്കിയ ഇടപാടുകളാണ് ഇതിന്റെ പ്രത്യേകത. ഇടപാടുകൾക്കായി ആറക്കങ്ങളുള്ള യോനോ കാഷ് പിൻ തയാറാക്കണം. ഇടപാടുകൾക്കായി ഉപഭോക്താക്കൾക്ക് ആറക്കങ്ങളുള്ള റഫറൻസ് നമ്പർ രജിസ്റ്റർ ചെയ്ത മൊബൈൽ നമ്പറിലേക്ക് എസ്എംഎസ് ആയി ലഭിക്കും. അടുത്ത അര മണിക്കൂറിനുള്ളിൽ തൊട്ടടുത്തുള്ള യോനോ കാഷ് പോയിന്റ് വഴി പിൻ നമ്പറും റെഫറൻസ് നമ്പറും ഉപയോഗിച്ച് പണം പിൻവലിക്കാനാകും.
അടുത്ത രണ്ടു വർഷങ്ങൾക്കുള്ളിൽ യോനോ വഴി എല്ലാ ഇടപാടുകളും ഒരൊറ്റ കുടക്കീഴിനുള്ളിലാക്കി ഒരു ഡിജിറ്റൽ ലോകം ഒരുക്കുന്നതിനാണ് ലക്ഷ്യമിടുന്നതെന്ന് എസ്ബിഐ ചെയർമാൻ രജനീഷ് കുമാർ പറഞ്ഞു. കൂടുതൽ സേവനങ്ങൾ വരുംനാളുകളിൽ യോനോയിൽ നിന്നും ലഭ്യമാക്കുന്നതിനുള്ള ഒരുക്കത്തിലാണ് എസ്ബിഐ. 2019 ഫെബ്രുവരി വരെ യോനോ 18 ദശലക്ഷത്തിലധികം പേർ ഡൗൺലോഡ് ചെയ്തു. ആൻഡ്രോയ്ഡി, ഐഒഎസ് മൊബൈൽ ഫോണുകളിൽ യോനോ ലഭ്യമാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ