ബാസല്‍: ഇന്ത്യന്‍ സെന്‍സേഷന്‍ പിവി സിന്ധു ലോക ബാഡ്മിന്റണ്‍ ചാമ്പ്യന്‍ഷിപ്പിന്റെ ഫൈനലില്‍ പ്രവേശിച്ചു. സെമിയില്‍ നാലാം സീഡ് ചൈനയുടെ ചെന്‍ യു ഫെയിയെ കീഴടക്കിയാണ് സിന്ധുവിന്റെ ഫൈനല്‍ പ്രവേശം. തുടര്‍ച്ചയായി ഇത് മൂന്നാം തവണയാണ് സിന്ധു ഫൈനലിലെത്തുന്നത്. കഴിഞ്ഞ രണ്ട് തവണയും തോല്‍വിയായിരുന്നു ഫലം. ഇത്തവണ കിരീടം നേടമെന്ന പ്രതീക്ഷയിലാണ് താരം.
ഏറെക്കുറെ ഏകപക്ഷീയമായ വനിതാ വിഭാഗം സെമിയില്‍ നേരിട്ടുള്ള ഗെയിമുകള്‍ക്കാണ് അഞ്ചാം സീഡായ സിന്ധു വിജയം പിടിച്ചത്. സ്‌കോര്‍: 21- 7, 21- 14. മത്സരം 40 മിനിറ്റാണ് നീണ്ടത്. ആദ്യ സെറ്റ് അനായാസം സിന്ധു പിടിച്ചെടുത്തപ്പോള്‍ രണ്ടാം ഗെയിമിലാണ് ചൈനീസ് താരം പൊരുതാനുള്ള ആര്‍ജവം കാണിച്ചത്. എന്നാല്‍ നിര്‍ണായക ഘട്ടത്തില്‍ ഫോം വിടാതെ കാത്ത സിന്ധു വിജയവും ഫൈനല്‍ ബര്‍ത്തും ഉറപ്പാക്കുകയായിരുന്നു.
മികച്ച റാലികളോടെയാണ് ഫെയി രണ്ടാം ഗെയിമില്‍ തിരിച്ചുവരാന്‍ ശ്രമിച്ചത്. സിന്ധുവിന്റെ പിഴവുകള്‍ തുടക്കത്തില്‍ ചൈനീസ് താരം അനുകൂലമാക്കി മാറ്റിയെങ്കിലും പോരാട്ട വീര്യം അവസാന വരെ നിലനിര്‍ത്താന്‍ ഫെയിക്കായില്ല.
നൊസോമി ഒകുഹാര, രത്ചനോക് ഇന്‍ഡനോണ്‍ എന്നിവരിലൊരാളാകും ഫൈനലില്‍ സിന്ധുവിന്റെ എതിരാളി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
