മുംബൈ: കൊറോണ വൈറസ് വ്യാപനം ചെറുക്കുന്നതിന്റെ ഭാഗമായി കൂടുതൽ കടുത്ത നിയന്ത്രണങ്ങളിലേക്ക് പോകുകയാണ് രാജ്യം. ഇതോടെ ഐപിഎല് 13ാം സീസണ് വീണ്ടും മാറ്റിവെച്ചേക്കുമെന്ന് സൂചന. മാർച്ച് 29ന് ആരംഭിക്കേണ്ടിയിരുന്ന സീസണ് നിലവില് ഏപ്രില് 15ലേക്ക് നീട്ടിയിരുന്നു. സാഹചര്യങ്ങള് കൂടുതല് സങ്കീർണമായാല് തീയതി വീണ്ടും നീട്ടാനാണ് ബിസിസിഐ ആലോചിക്കുന്നതെന്ന് ദേശീയ മാധ്യമങ്ങൾ റിപ്പോർട്ട് ചെയ്തു.
ഐപിഎല് 2020 ഈ വർഷം അവസാനത്തോടെ നടത്താന് ആലോചനയുള്ളതായാണ് ബിസിസിഐ ഉന്നതനെ ഉദ്ധരിച്ച് മാധ്യമങ്ങൾ പറയുന്നത്. ഈ മാസം അവസാനത്തോടെ ഇക്കാര്യത്തില് തീരുമാനമായേക്കും. മാരക വൈറസ് വ്യാപനം നിയന്ത്രണവിധേയമാകാതിരുന്നാല് ഐപിഎല് ഉപേക്ഷിച്ചേക്കും എന്നും സൂചനയുണ്ട്.
ഇന്ത്യന് പ്രീമിയർ ലീഗിന്റെ ഭാവി ചർച്ച ചെയ്യാന് നാളെ നിർണായക യോഗം ചേരുമെന്ന് നേരത്തെ റിപ്പോർട്ടുകളുണ്ടായിരുന്നു. കോണ്ഫറന്സ് കോളിലൂടെയാണ് ബിസിസിഐയും ഫ്രാഞ്ചൈസികളും ഇക്കാര്യം ചർച്ച ചെയ്യുകയെന്നാണ് വാർത്താ ഏജന്സിയായ എഎന്ഐ റിപ്പോർട്ട് ചെയ്യുന്നു. കൊവിഡ് 19 ഭീതിയെ തുടർന്ന് മുംബൈയിലെ ബിസിസിഐ ആസ്ഥാനം അടച്ചതോടെയാണ് യോഗം കോണ്ഫറന്സ് കോള് വഴിയാക്കാന് തീരുമാനിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ