ലാഹോര്: ഏതെങ്കിലും ഒരു ഫോര്മാറ്റിലായി ചുരുങ്ങിയാലും ഹര്ദിക് പാണ്ഡ്യക്ക് അതിജീവിക്കാന് കഴിയില്ലെന്ന് പാകിസ്ഥാന് മുന് താരം സല്മാന് ബട്ട്. ഹര്ദിക്കിന്റെ ശരീരം അത്രമാത്രം ദുര്ബലമാണ് എന്നാണ് സല്മാന് ബട്ട് പറയുന്നത്.
ശരിയായ ഡയറ്റിലൂടേയും വെയിറ്റ് ട്രെയ്നിങ്ങിലൂടേയും ഹര്ദിക്ക് മസിലുകള് കൂട്ടേണ്ടതുണ്ട്. രവി ശാസ്ത്രി കഴിഞ്ഞ ദിവസം പറഞ്ഞത് ഹര്ദിക് കഠിനാധ്വാനം ചെയ്ത് നാല് ഓവര് എറിയാന് പാകത്തില് മാറണം എന്നാണ്. അതിനര്ഥം ഹര്ദിക്കിന് ഇപ്പോള് നാല് ഓവറും എറിയാന് കഴിയില്ലെന്നാണ്, സല്മാന് ബട്ട് പറയുന്നു.
ടി20 ലോകകപ്പ് കളിച്ചത് ഫിനിഷറുടെ റോളില്
കഴിഞ്ഞ ട്വന്റി20 ലോകകപ്പിലാണ് ഹര്ദിക് അവസാനം കളിച്ചത്. ഫിറ്റ്നസ് ഇല്ലാതിരുന്നിട്ടും ഹര്ദിക്കിനെ ടീമില് ഉള്പ്പെടുത്തിയത് വലിയ വിവാദമായിരുന്നു. ഫിനിഷര് എന്ന നിലയിലാണ് ഹര്ദിക്കിനെ ഇന്ത്യ ടി20 ലോകകപ്പില് പരിഗണിച്ചത്. എന്നാല് ബാറ്റിങ്ങിലും ഹര്ദിക്കിന് കാര്യമായൊന്നും ചെയ്യാനായില്ല.
കഴിഞ്ഞ ഐപിഎല് സീസണിലും മുംബൈക്ക് വേണ്ടി ഹര്ദിക് ഒരു പന്ത് പോലും എറിഞ്ഞിരുന്നില്ല. താര ലേലത്തിന് മുന്പായി മുംബൈ ടീമില് നിലനിര്ത്തിയ കളിക്കാരെ പ്രഖ്യാപിച്ചപ്പോള് ഹര്ദിക്കിന്റെ പേരും അതിലുണ്ടായില്ല. ഫിറ്റ്നസിലേക്ക് തിരിച്ചെത്തുന്നതില് വീഴ്ച പറ്റിയാല് അടുത്ത താര ലേലത്തില് വന് തുക കണ്ടെത്തുന്നതില് നിന്ന് ഹര്ദിക്കിന് തിരിച്ചടിയാവും.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ