ലണ്ടന്‍: അഭ്യൂഹങ്ങള്‍ക്കും ഊഹാപോഹങ്ങള്‍ക്കും വിരാമം. ബുണ്ടസ് ലീഗ ക്ലബ് ബൊറൂസിയ ഡോര്‍ട്മുണ്ടില്‍ നിന്ന് ഇംഗ്ലീഷ് താരം ജഡോന്‍ സാഞ്ചോ മാഞ്ചസ്റ്റര്‍ യുനൈറ്റഡിലേക്ക് ചേക്കേറി. താരത്തിന്റെ ക്ലബ് മാറ്റം സംബന്ധിച്ച് ഒദ്യോഗിക സ്ഥിരീകരണം വന്നു. താരം ക്ലബ് വിടുന്നതായി ഡോര്‍ട്മുണ്ടും എത്തുന്നത് വ്യക്തമാക്കി മാഞ്ചസ്റ്റര്‍ യുനൈറ്റഡും സ്ഥിരീകരിച്ചു.
നീണ്ട രണ്ട് വര്‍ഷത്തെ ശ്രമത്തിനു ശേഷമാണ് സാഞ്ചോയെ മാഞ്ചസ്റ്റര്‍ യുനൈറ്റഡ് സൈന്‍ ചെയ്യുന്നത്. യുനൈറ്റഡ്, താരവുമായും ഡോര്‍ട്മുണ്ടുമായും കരാറില്‍ എത്തിയതായി ക്ലബ് അറിയിച്ചു. 85 മില്യണ്‍ യൂറോയ്ക്ക് ആണ് 21കാരനുമായി റെഡ് ഡെവിള്‍സ് കരാറിലെത്തിയിരിക്കുന്നത്.
ജഡോന്‍ സാഞ്ചോയെ കൈമാറുന്നതിനായി ബോറുസിയ ഡോര്‍ട്മുണ്ടുമായി തത്വത്തില്‍ ധാരണയിലെത്തിയതായി മാഞ്ചസ്റ്റര്‍ വ്യക്തമാക്കി. 2017ലാണ് സാഞ്ചോ ഡോര്‍ട്മുണ്ടിലെത്തുന്നത്.
യൂറോ കപ്പിന് ശേഷം കരാര്‍ ഒപ്പിടല്‍, മെഡിക്കല്‍ എന്നിവ പൂര്‍ത്തിയാകും. കഴിഞ്ഞ സീസണില്‍ യുനൈറ്റഡിനോട് 120 മില്യണ്‍ യൂറോ ജര്‍മന്‍ ക്ലബ് ആവശ്യപ്പെട്ടിരുന്നു. മാഞ്ചസ്റ്റര്‍ യുനൈറ്റഡ് താരത്തിന് 2026വരെയുള്ള കരാര്‍ ആണ് നല്‍കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
