അബുദാബി: ഐപിഎലില് ചെന്നൈ സൂപ്പര് കിങ്സിനെതിരെ ഡല്ഹി ക്യാപിറ്റല്സിന് 137 റണ്സ് വിജയലക്ഷ്യം. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ചെന്നൈ സൂപ്പര് കിങ്സ് അഞ്ച് വിക്കറ്റ് നഷ്ടത്തില് 136 റണ്സെടുത്തു. 43 പന്തില് നിന്ന് രണ്ടു സിക്സും അഞ്ചു ഫോറുമടക്കം 55 റണ്സോടെ പുറത്താകാതെ നിന്ന അമ്പാട്ടി റായുഡുവാണ് ചെന്നൈയുടെ ടോപ് സ്കോറര്.
അഞ്ചാം വിക്കറ്റില് ക്രീസില് ഒന്നിച്ച റായുഡു ധോനി സഖ്യമാണ് ചെന്നൈയെ ഭേദപ്പെട്ട സ്കോറിലെത്തിച്ചത്. ഇരുവരും ചേര്ന്നെടുത്ത 70 റണ്സാണ് ചെന്നൈ ഇന്നിങ്സിന്റെ നട്ടെല്ല്.
റോബിന് ഉത്തപ്പ 19, സ്കോര് ചെയ്യാന് ബുദ്ധിമുട്ടിയ ധോനി 27 പന്തുകള് നേരിട്ട് 18 റണ്സെടുത്തു. ഒരു ബൗണ്ടറി പോലും ഇല്ലാതെയായിരുന്നു ധോനിയുടെ ഇന്നിങ്സ്. ഋതുരാജ് ഗെയ്ക്വാദ് (13 പന്തില് 13), ഫാഫ് ഡുപ്ലേസി (എട്ട് പന്തില് 10) എന്നിങ്ങനെയാണ് മറ്റു പ്രധാന താരങ്ങളുടെ സ്കോറുകള്. ഡല്ഹിക്കായി അക്സര് പട്ടേല് രണ്ട് വിക്കറ്റ് വീഴ്ത്തി. ആന്റിച് നോര്ദെ, ആവേശ് ഖാന്, ആര്. അശ്വിന് എന്നിവര് ഓരോ വിക്കറ്റ് വീതം വീഴ്ത്തി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ