അഹമ്മദാബാദ്: റോയൽ ചലഞ്ചേഴ്സ് ബാംഗ്ലൂരിനെ മലർത്തിയടിക്കാൻ തുണച്ച പഞ്ചാബ് ഓൾ റൗണ്ടർ ഹർപ്രീത് ബ്രാറിന്റെ ട്വീറ്റ് വീണ്ടും വൈറലാവുന്നു. സിങ് ഈസ് കിങ് സിനിമയിലെ അക്ഷയ് കുമാറിനോട് സാമ്യം ഉണ്ടെന്ന നിലയിൽ വന്ന ആരാധകന്റെ കമന്റിന് ഹർപ്രീത് നൽകിയ മറുപടിയാണ് ചർച്ചയാവുന്നത്.
പണത്തിന് വേണ്ടി ഞങ്ങൾ ടർബൻ അണിയാറില്ല, ഞാൻ കർഷകരെ പിന്തുണയ്ക്കുന്നു എന്ന ഹാഷ് ടാഗോടെ ഹർപ്രീത് പറഞ്ഞു. ആരാധകന്റെ സന്ദേശത്തിന്റെ സ്ക്രീൻഷോട്ട് സഹിതം പങ്കുവെച്ചായിരുന്നു ഹർപ്രീതിന്റെ ട്വീറ്റ്. ബാംഗ്ലൂരിനെതിരായ ഹർപ്രീതിന്റെ പ്രകടനത്തിന് പിന്നാലെ ഏതാനും ദിവസം മുൻപ് വന്ന ഈ ട്വീറ്റും പൊങ്ങി വരുന്നു.
ഹർപ്രീതിന്റെ മൂന്നാമത്തെ ഐപിഎൽ സീസണാണ് ഇത്. എന്നാൽ ഐപിഎൽ കരിയറിൽ ഇതുവരെ നാല് മത്സരങ്ങൾ മാത്രമാണ് താരം കളിച്ചത്. ബാറ്റിങ്ങിന് ഇറങ്ങിയപ്പോൾ 17 പന്തിൽ നിന്ന് ഹർപ്രീത് ബാംഗ്ലൂരിന് എതിരെ 25 റൺസ് നേടി. എട്ടാം വിക്കറ്റിൽ രാഹുലിനൊപ്പം നിന്ന് 61 റൺസാണ് ഹർപ്രീത് കൂട്ടിച്ചേർത്തത്. കോഹ് ലി, ഡിവില്ലിയേഴ്സ്, മാക്സ് വെൽ എന്നിവരെ കൂടാരം കയറ്റി ചെയ്സിങ്ങിൽ ബാംഗ്ലൂരിനെ പ്രതിസന്ധിയിലേക്ക് തള്ളിയിടുകയും ചെയ്തു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ