ഐഎസ്എല്‍; ഗോവയെ തകര്‍ത്ത് മുംബൈ സിറ്റി എഫ്‌സി ഫൈനലില്‍
മുംബൈ: ഇന്ത്യന്‍ സൂപ്പര്‍ ലീഗില്‍ മോഹന്‍ ബഗാന്‍ സൂപ്പര്‍ ജയന്റ്- മുംബൈ സിറ്റി എഫ്‌സി ഫൈനല്‍. രണ്ടാം സെമിയില്‍ എഫ്‌സി ഗോവയെ വീഴ്ത്തി മുംബൈ സിറ്റി ഫൈനലുറപ്പിച്ചതോടെയാണ് ചിത്രം തെളിഞ്ഞത്. മെയ് നാലിനാണ് ഫൈനല്‍ പോരാട്ടം.
ഇരു പാദങ്ങളിലായി നടന്ന സെമിയില്‍ മുംബൈ സിറ്റി- എഫ്‌സി ഗോവയെ 5-2നു തകര്‍ത്താണ് ഫൈനലുറപ്പിച്ചത്. ആദ്യ പാദത്തില്‍ എവേ പോരില്‍ 3-2ന്റെ വിജയം പിടിച്ച മുംബൈ ഇന്നലെ രണ്ടാം പാദത്തില്‍ 2-0ത്തിനു വിജയം കണ്ടു.
ആദ്യ പകുതി ഗോള്‍ രഹിതമായപ്പോള്‍ രണ്ട് ഗോളുകളും രണ്ടാം പകുതിയിലാണ് പിറന്നത്. മുംബൈക്കായി ജോര്‍ജ് പെരേര ഡയസ്, ലാലിയന്‍സുല ചങ്‌തെ എന്നിവര്‍ ഗോള്‍ നേടി.
വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍
കളിയുടെ 69ാം മിനിറ്റിലാണ് ഡയസിലൂടെ മുംബൈ ഗോവ പ്രതിരോധം പൊളിച്ചത്. 83ാം മിനിറ്റില്‍ ചങ്‌തെയും വല ചലിപ്പിച്ചു. ഗോവയുടെ ഭാഗത്തു നിന്നു കാര്യമായ മുന്നേറ്റമുണ്ടായില്ല. ഒരു തവണ മാത്രമാണ് അവര്‍ ലക്ഷ്യത്തിലേക്ക് ഷോട്ടുതിര്‍ത്തത്.
2020-21 സീസണിലെ ഫൈനല്‍ പോരാട്ടത്തിന്റെ ആവര്‍ത്തനമാണ് ഇത്തവണ. അന്ന് മുംബൈ സിറ്റി മോഹന്‍ ബഗാന്‍ സൂപ്പര്‍ ജയന്റിനെ (അന്ന് എടികെ മോഹന്‍ ബഗാന്‍) വീഴ്ത്തിയാണ് തങ്ങളുടെ കന്നി കിരീടം സ്വന്തമാക്കിയത്. മോഹന്‍ ബഗാന്‍ നിലവിലെ ചാമ്പ്യന്‍മാര്‍ കൂടിയാണ്. മുംബൈ സിറ്റിയോടു കണക്കു തീര്‍ത്ത് കിരീട നേട്ടം ആവര്‍ത്തിക്കുകയാണ് അവരുടെ ലക്ഷ്യം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
