വിശാഖപട്ടണം: കിട്ടിയ അവസരങ്ങള് മുതലാക്കാന് സാധിക്കാതെ പരാജയപ്പെടുന്ന ശുഭ്മാന് ഗില്ലിനു മുന്നറിയിപ്പുമായി മുന് ഇന്ത്യന് പരിശീലകന് രവി ശാസ്ത്രി. രണ്ടാം ടെസ്റ്റില് മികവോടെ തുടങ്ങിയെങ്കിലും ഗില്ലിനു അധികം ആയുസുണ്ടായില്ല. 34 റണ്സാണ് ഗില്ലിനു ഇത്തവണ കണ്ടെത്താന് സാധിച്ചത്.
പിന്നാലെയാണ് ശാസ്ത്രിയുടെ പ്രതികരണം. ഇന്ത്യയുടെ ടെസ്റ്റ് സ്പെഷലിസ്റ്റ് ചേതേശ്വര് പൂജാര രഞ്ജിയില് മിന്നും ഫോമില് ബാറ്റ് വീശുന്ന കാര്യം ചൂണ്ടിയാണ് ശാസ്ത്രിയുടെ മുന്നറിയിപ്പ്.
'നിലവിലെ ഇന്ത്യന് ടീം ചെറുപ്പക്കാരുടെ സംഘമാണ്. അവര്ക്ക് തങ്ങളുടെ മികവ് തെളിയിക്കാനുള്ള അവസരവുമുണ്ട്. എന്നാല് അവര് മറക്കാന് പാടില്ലാത്ത ഒരു കാര്യമുണ്ട്. പൂജാര കാത്തു നില്ക്കുന്നു. നിലവിലെ രഞ്ജി സീസണില് മിന്നും ഫോമിലാണ്. അദ്ദേഹം സെലക്ടര്മാരുടെ റഡിലുള്ള താരം കൂടിയാണ്'- ശാസ്ത്രി വ്യക്തമാക്കി.
മികവോടെ തുടങ്ങാന് ഗില്ലിനു ഇത്തവണ സാധിച്ചു. 46 പന്തുകള് നേരിട്ടാണ് താരം 34 റണ്സിലെത്തിയത്. എന്നാല് ജെയിംസ് ആന്ഡേഴ്സിന്റെ പന്തില് വിക്കറ്റ് കീപ്പര് ബെന് ഫോക്സിനു പിടിനല്കിയാണ് ഗില് മടങ്ങിയത്.
ഒരു ഇരട്ട സെഞ്ച്വറിയുള്പ്പെടെ രഞ്ജിയില് ഏഴ് ഇന്നിങ്സുകളില് നിന്നായി 538 റണ്സടിച്ച് കത്തുന്ന ഫോമിലാണ് നിലവില് പൂജാര. 89.66ആണ് ശരാശരി. പരിചയസമ്പത്ത് ഏറെയുള്ള വെറ്ററന് കൂടിയാണ് പൂജാര. ക്ഷമയോടെ ക്രീസില് നിന്നു ഇന്നിങ്സ് കെട്ടിപ്പടുക്കാന് പ്രത്യേക വിരുതുള്ള താരം കൂടിയാണ് പൂജാര.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ