കോട്ടയം: ശബരിമലയില് വിശ്വാസികള്ക്കെതിരെയുളള സംസ്ഥാന സര്ക്കാരിന്റെ നിലപാട് അധാര്മ്മികവും ജനാധിപത്യവിരുദ്ധവുമാണെന്ന് എന്എസ്എസ്. വിശ്വാസവും ആചാരാനുഷ്ഠാനവും സംരക്ഷിക്കാനുള്ള ഭരണഘടനാപരമായ അവകാശം നിലനില്ക്കുന്ന സാഹചര്യത്തില് കോടതിവിധിയുടെ അടിസ്ഥാനത്തില് റിവ്യൂഹര്ജി ഫയല് ചെയ്യുന്നതിനോ, കോടതിയെ സാഹചര്യം ബോദ്ധ്യപ്പെടുത്തുന്നതിനോ സര്ക്കാര് തയാറാകുന്നില്ല. ദേവസ്വം ബോര്ഡിനെ അതിന് അനുവദിക്കുന്നുമില്ല. അടിയന്തരാവസ്ഥയ്ക്കു തുല്യമായ തരത്തില് വിശ്വാസികള്ക്കെതിരെ പൊലീസ് നടപടികളുമായി സര്ക്കാര് നീങ്ങുകയാണെന്ന് ജനറല് സെക്രട്ടറി ജി. സുകുമാരന്നായരുടെ പേരിലുള്ള പത്രക്കുറിപ്പില് പറയുന്നു.
പന്തളം കൊട്ടാരത്തെയും തന്ത്രിമാരെയും മുഖ്യമന്ത്രിയും മറ്റു ചില മന്ത്രിമാരും വിലകുറഞ്ഞ ഭാഷയില് അവഹേളിക്കുകയും അപമാനിക്കുകയും ചെയ്യുന്നത് വിശ്വാസികളുടെ മനസ്സിനെ മുറിവേല്പ്പിച്ചു. എന്എസ്എസ് ഇക്കാര്യത്തില് വിശ്വാസികള്ക്കൊപ്പമാണെന്നും നിയമപരമായും സമാധാനപരമായും ഈ വിഷയത്തില് പ്രതികരിക്കാനാണ് ഉദ്ദേശിക്കുന്നതെന്നും പത്രക്കുറിപ്പില് വ്യക്തമാക്കുന്നു.
നായര് സര്വീസ് സൊസൈറ്റി ഈ വിഷയത്തില് വിശ്വാസികള്ക്ക് അനുകൂലമായ നിലപാടാണ് സ്വീകരിച്ചിട്ടുള്ളത്. നിയമപരമായ രീതിയിലും സമാധാനപരമായ മാര്ഗ്ഗത്തിലും ഈ വിഷയത്തില് പ്രതികരിക്കാനാണ് ഉദ്ദേശിക്കുന്നത്. ഒക്ടോബര് 31, നായര് സര്വീസ് സൊസൈറ്റിയുടെ പതാകാദിനമാണ്. സംസ്ഥാനമൊട്ടാകെ കരയോഗതലത്തില് പതാക ഉയര്ത്തിയതിനുശേഷം ബന്ധപ്പെട്ട ക്ഷേത്രങ്ങളില് വഴിപാടും കരയോഗമന്ദിരത്തില് അയ്യപ്പന്റെ ചിത്രത്തിനു മുമ്പില് നിലവിളക്ക് കൊളുത്തി വിശ്വാസസംരക്ഷണനാമജപവും നടത്താന് തീരുമാനിച്ചതായി പത്രക്കുറിപ്പില് പറയുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ