റാന്നി: പമ്പ നദിയില് സ്ഥിതി ചെയ്യുന്ന മണിയാര് അണക്കെട്ടില് ഗുരുതര തകരാര്. അണക്കെട്ടിന്റെ പല ഷട്ടറുകളുടേയും കോണ്ക്രീറ്റ് അടര്ന്നുപോയിരിക്കുകയാണ്. കൂടാതെ സംരക്ഷണ ഭിത്തി ഇടിഞ്ഞിരിക്കുകയാണ്. അണക്കെട്ട് ഈ തുലാവര്ഷത്തെ അതിജീവിക്കുമോ എന്ന ആശങ്കയിലാണ്.
കഴിഞ്ഞ 15ന് അണക്കെട്ട് കവിഞ്ഞ് വെള്ളമൊഴുകിയിരുന്നു. നാലു ഷട്ടറുകള് തുറന്നുവിട്ടാണ് ജലനിരപ്പ് കുറച്ചത്. വലതുകരയോടു ചേര്ന്ന ഭാഗത്തെ രണ്ടാം നമ്പര് ഷട്ടര് തുറക്കാന് കഴിഞ്ഞിരുന്നില്ല. ഷട്ടറിനു മുകളിലൂടെ വെള്ളം കുത്തിയൊഴുകുകയായിരുന്നു. മലവെള്ളപ്പാച്ചിലില് രണ്ടാം ഷട്ടറിന്റെ താഴ്ഭാഗത്ത് അണക്കെട്ടിനു നാശം നേരിട്ടു. കോണ്ക്രീറ്റ് അടര്ന്നുപോയിട്ടുണ്ട്. വലതുകരയിലെ ഒന്നാം നമ്പര് ഷട്ടറിന്റെ താഴ്ഭാഗത്തും ഇത്തരത്തില് കോണ്ക്രീറ്റ് അടര്ന്നിട്ടുണ്ട്. വീണ്ടും വെള്ളം കുത്തിയൊലിച്ചാല് ശേഷിക്കുന്ന ഭാഗവും തകരും.
അണക്കെട്ടില് ഇപ്പോഴും നിറയെ വെള്ളമുണ്ട്. ഷട്ടറുകളിലൂടെ വെള്ളം പുറത്തേക്ക് വിടുന്നുണ്ടെങ്കിലും സുരക്ഷിതമല്ല. ഡാമിന് ഏതെങ്കിലും രീതിയിലുള്ള തകര്ച്ച സംഭവിച്ചാല് മണിയാര് മുതല് പൂവത്തുംമൂട് വരെ കക്കാട്ടാറിന്റെയും പൂവത്തുംമൂട്- ചെങ്ങന്നൂര് വരെ പമ്പാനദിയുടെ തീരപ്രദേശങ്ങളെയും ബാധിക്കും. ശബരിഗിരി, കക്കാട് പദ്ധതികളിലും കാരിക്കയം, അള്ളുങ്കല് എന്നീ സ്വകാര്യ പദ്ധതികളിലും വൈദ്യുതി ഉല്പാദനത്തിനുശേഷം പുറംതള്ളുന്ന വെള്ളമാണ് മണിയാറില് സംഭരിക്കുന്നത്. 31.5 മീറ്ററാണ് ഡാമിന്റെ ജലസംഭരണ ശേഷി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ