കൊച്ചി: പല മോഷണങ്ങളും നിങ്ങള്‍ കേട്ടു കാണും പക്ഷേ നാട്ടിലെ മൊത്തം ഭാഗ്യവും കൊണ്ട് ഒരാള്‍ കടന്നു കളഞ്ഞാലോ? കൊച്ചി നഗരത്തിലാണ് അങ്ങനെയൊരു ഭാഗ്യ മോഷണം നടന്നത്. ഭാഗ്യം എന്നു പറഞ്ഞാല്‍ എന്താണെന്നോര്‍ത്ത് തലപുകയ്ക്കണ്ട. ലോട്ടറി ടിക്കറ്റ് തന്നെ. ഇന്നലെയാണ് ബൈക്കില്‍ എത്തിയ ഒരു യുവാവ് 4000 രൂപ വിലമതിക്കുന്ന ലോട്ടറി തട്ടിയെടുത്തുത്തത്. പണം തരാം എന്ന് പറഞ്ഞ് വിളിച്ചുകൊണ്ടു പോയതിന് ശേഷമായിരുന്നു മോഷണം.
പുതിയ റോഡ് ജംഗ്ഷന് സമീപം ലോട്ടറി ടിക്കറ്റ് വില്‍പ്പന നടത്തുന്ന രാജുവിന്റേയും ജാനകിയുടേയും ടിക്കറ്റുകളാണ് അതി വിദഗ്ധമായി തട്ടിയെടുത്തത്. ഇന്നലെ രാവിലെ 11 മണിയോടെയായിരുന്നു സംഭവം. ലോട്ടറി കച്ചവടക്കാരെ അന്വേഷിച്ചാണ് യുവാവ് പ്രദേശത്ത് എത്തിയത്. ഇരുവരുടേയും കൈയില്‍ നിന്ന് നൂറില്‍ അധികം ടിക്കറ്റുകള്‍ അയാള്‍ വാങ്ങി. എന്നാല്‍ പേഴ്‌സില്‍ കാശില്ലെന്നും അടുത്തുള്ള എടിഎമ്മില്‍ നിന്ന് പണം എടുത്തു തരാം എന്നും പറഞ്ഞ് രാജുവിനെ തന്റെ ബൈക്കില്‍ കയറ്റി.
ഇയാളുടെ വാക്ക് വിശ്വസിച്ച രാജു ഇയാളുടെ കൂടെ പോയി. പണമെടുക്കാന്‍ കരിങ്ങാച്ചിറ ജംഗ്ഷനിലെ എടിഎമ്മിന് മുന്നിലെത്തി. എന്നാല്‍ രാജുവിനെ അവിടെ ഇറക്കിയശേഷം ലോട്ടറി ടിക്കറ്റുകളുമായി ഇയാള്‍ കടന്നു കളയുകയായിരുന്നു. മോഷണം പോയ ഒരു ടിക്കറ്റിന് 1000 രൂപയും അടിച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
