പത്തനംതിട്ട : കോന്നി ഗവ. മെഡിക്കല് കോളേജിലെ ഒപി വിഭാഗം തിങ്കളാഴ്ച ഉദ്ഘാടനം ചെയ്യും. രാവിലെ 10.30ന് മുഖ്യമന്ത്രി പിണറായി വിജയനാണ് ഉദ്ഘാടനം ചെയ്ത് നാടിന് സമര്പ്പിക്കുന്നത്. വിഡിയോ കോൺഫറൻസ് വഴിയാണ് സംസ്ഥാനത്തെ 33–ാമത്തെ മെഡിക്കൽ കോളജിന്റെ ഉദ്ഘാടനം നിർവഹിക്കുന്നത്.
മെഡിക്കൽ കോളജ് ആശുപത്രി കെട്ടിടത്തിന്റെ നടുത്തളത്തിലാണ് ഉദ്ഘാടന ചടങ്ങ് നടക്കുന്നത്. 50ൽ താഴെ ആളുകൾക്കു മാത്രമേ ചടങ്ങിലേക്ക് പ്രവേശനമുള്ളൂ. ഉദ്ഘാടന ചടങ്ങിൽ കോവിഡ് മാനദണ്ഡം കർശനമായി പാലിക്കണമെന്ന് ജില്ലാ കലക്ടർ ഉദ്യോഗസ്ഥർക്ക് നിർദേശം നൽകി.
പൊതു ജനങ്ങൾക്ക് ഉദ്ഗാടന ചടങ്ങിലേക്ക് പ്രവേശനം ഉണ്ടായിരിക്കില്ല. പങ്കെടുക്കുന്ന എല്ലാവർക്കും കോവിഡ് ആന്റിജൻ പരിശോധന നടത്തും. കോന്നി നിയോജക മണ്ഡലത്തില് അരുവാപ്പുലം പഞ്ചായത്തിലാണ് മെഡിക്കല് കോളേജ് സ്ഥിതി ചെയ്യുന്നത്. പത്തനംതിട്ട ജില്ലയുടേയും സമീപ ജില്ലകളിലെയും ആരോഗ്യ വിദ്യാഭ്യാസ മേഖലയില് കോന്നി മെഡിക്കല് കോളേജ് ഒരു മുതല്ക്കൂട്ടായി മാറുമെന്ന് ആരോഗ്യമന്ത്രി കെ കെ ശൈലജ അഭിപ്രായപ്പെട്ടു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ