ആലപ്പുഴ: ആന്ജിയോഗ്രാം നടത്തുന്നതിനിടെ യന്ത്രഭാഗം ഹൃദയ വാല്വില് തറഞ്ഞു കയറിയതിനെ തുടര്ന്ന് ചികിത്സയിലായിരുന്ന വീട്ടമ്മ മരിച്ചു. തൃക്കുന്നപ്പുഴ ചിങ്ങോലി ആരാധനയില് അജിത് റാമിന്റെ ഭാര്യ ബിന്ദു ആണ് (55) ചൊവ്വാഴ്ച രാത്രി മരിച്ചത്. കഴിഞ്ഞ മാസം 4ന് ആയിരുന്നു തട്ടാരമ്പലത്തെ സ്വകാര്യ ആശുപത്രിയില് ആന്ജിയോഗ്രാം നടത്തിയത്.
ചികിത്സയ്ക്കിടെ ഉപകരണം ഒടിഞ്ഞതായി ആശുപത്രി അധികൃതര് അറിയിച്ചതിനെ തുടര്ന്ന് ബിന്ദുവിനെ മറ്റൊരു ആശുപത്രിയില് എത്തിച്ച് ഉപകരണത്തിന്റെ ഭാഗം ശസ്ത്രക്രിയയിലൂടെ നീക്കുകയായിരുന്നു. ആശുപത്രിയില്നിന്നെത്തി വീട്ടില് ചികിത്സയിലിരിക്കെ ചൊവ്വാഴ്ച രാത്രി അസ്വസ്ഥത ഉണ്ടായി. ആശുപത്രിയില് കൊണ്ടുപോയെങ്കിലും ജീവന് രക്ഷിക്കാനായില്ല.
തട്ടാരമ്പലത്തിലെ ആശുപത്രിയിലുണ്ടായ സംഭവത്തെപ്പറ്റി ബന്ധുക്കള് ജില്ലാ പൊലീസ് മേധാവിക്കു പരാതി നല്കിയിരുന്നു. സംഭവത്തില് പൊലീസ് അന്വേഷണം തുടങ്ങി. ശസ്ത്രക്രിയയ്ക്കു ചെലവായ 2,60,000 രൂപ നല്കാമെന്ന് തട്ടാരമ്പലത്തിലെ ആശുപത്രി അധികൃതര് ബന്ധുക്കളെ അറിയിച്ചു. ഉപകരണം ഒടിഞ്ഞു വീഴുന്നത് അപൂര്വമായി സംഭവിക്കുന്നതാണെന്നും വിശദീകരിച്ചു.ഭാര്യയുടെ രോഗവിവരം അറിഞ്ഞ് മസ്കത്തില് നിന്ന് എത്തിയ അജിത് റാം ചിങ്ങോലി പഞ്ചായത്തിന്റെ ക്വാറന്റീന് കേന്ദ്രത്തിലാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ