തിരുവനന്തപുരം: തലസ്ഥാനത്ത് രോഗവ്യാപനം രൂക്ഷമാകുന്ന സാഹചര്യത്തിൽ മന്ത്രിസഭാ യോഗം ഓൺലൈൻ വഴി നടത്താൻ തീരുമാനം. തിങ്കളാഴ്ച നടക്കാനിരിക്കുന്ന പ്രത്യേക മന്ത്രിസഭായോഗം വീഡിയോ കോൺഫറൻസിലൂടെ നടക്കും. മന്ത്രിമാർ സ്വന്തം വീടുകളിൽ ഇരുന്ന് ഓൺലൈനായിട്ടാവും യോഗത്തിൽ പങ്കെടുക്കുക. സംസ്ഥാനത്തിന്‍റെ ചരിത്രത്തിൽ ആദ്യമായാണ് വീഡിയോ കോൺഫറൻസിലൂടെ മന്ത്രിസഭായോഗം ചേരുന്നത്.
നേരത്തെ നിയമസഭാ സമ്മേളനം കോവിഡ് മൂലം മാറ്റിയിരുന്നു. മന്ത്രിസഭായോഗം അടക്കം നടക്കുകയും നിയമസഭാ സമ്മേളനം മാറ്റിവയ്ക്കുകയും ചെയ്തതിനെ പ്രതിപക്ഷം വിമർശിച്ചിരുന്നു. ലോക്ക്ഡൗൺ അടക്കമുള്ള നിയന്ത്രണങ്ങളെക്കുറിച്ച് മന്ത്രിസഭായോഗത്തിലാണ് തീരുമാനമുണ്ടാകുക. തലസ്ഥാനത്ത് സമ്പർക്ക വ്യാപനം രൂക്ഷമാകുന്നത് ആശങ്ക വർധിപ്പിക്കുന്നുണ്ട്. ഇന്നലെ മാത്രം 240 പേർക്കാണ് തിരുവനന്തപുരത്ത് രോഗം സ്ഥിരീകരിച്ചത്. ഇവരിൽ 218 പേർക്കും സമ്പർക്കത്തിലൂടെയായിരുന്നു രോഗം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
