കൊച്ചി: കോവിഡ് പ്രതിസന്ധിയെത്തുടർന്ന് ജോലി നഷ്ടപ്പെട്ട് നാട്ടിലെത്തുന്ന പ്രവാസികളുടെ പുനരധിവാസം ലക്ഷ്യമിട്ട് വെബ് പോർട്ടലുമായി ബിജെപി. കേന്ദ്രനേതൃത്വത്തിന്റെ നിർദേശത്തെ തുടർന്നാണ് കേരളഘടകം വെബ് പോർട്ടൽ ആരംഭിക്കുന്നത്. അടുത്തയാഴ്ച പോർട്ടൽ ആരംഭിക്കും.
പോർട്ടലിൽ രജിസ്റ്റർ ചെയ്യുന്ന മലയാളികളുടെ യോഗ്യതയും പ്രവൃത്തിപരിചയവും മറ്റ് വിവരങ്ങളും അതത് സംസ്ഥാനങ്ങളിലെ കമ്പനികൾക്കും ബിജെപി ഒരുക്കുന്ന പൊതുപോർട്ടലിനും കൈമാറും. ബിജെപി ഭരിക്കുന്ന 17 സംസ്ഥാനങ്ങളിലെയും പൊതുമേഖലാ - സ്വകാര്യസ്ഥാപനങ്ങളിൽ വിദേശത്തു നിന്നു തിരിച്ചെത്തുന്ന തൊഴിലാളികൾക്ക് അവസരമൊരുക്കുമെന്നാണ് പാർട്ടി പറയുന്നത്.
ലോക്ഡൗണിന് ശേഷം രാജ്യത്ത് വരേണ്ട മാറ്റങ്ങളെക്കുറിച്ച് വിവിധ മേഖലകളിൽ നിന്ന് തിരഞ്ഞെടുക്കപ്പെട്ട പ്രതിനിധികൾക്ക് കേന്ദ്ര മന്ത്രിമാരുമായി വിഡിയോ കോൺഫറൻസിലൂടെ സംസാരിക്കുന്നതിനും ബിജെപി കേരളഘടകം അവസരമൊരുക്കും. വ്യവസായം, ആരോഗ്യം, കൃഷി തുടങ്ങി 12 മേഖലയിലെ മാറ്റങ്ങൾ ചർച്ചചെയ്യാൻ ഇതുവഴി അവസരമുണ്ടാകും.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ