കൊച്ചി : തദ്ദേശ തെരഞ്ഞെടുപ്പ് തീയതി തീരുമാനിച്ചിട്ടില്ലെന്ന് സംസ്ഥാന തെരഞ്ഞെടുപ്പ് കമ്മീഷന്. കോവിഡ് മഹാമാരിയെക്കുറിച്ച് കമ്മീഷന് വ്യക്തമായ ബോധ്യമുണ്ട്. ആരോഗ്യവകുപ്പ് സെക്രട്ടറി അടക്കമുള്ളനരുമായി കമ്മീഷന് ചര്‍ച്ച ചെയ്തിരുന്നു. എല്ലാ പാര്‍ട്ടികളുമായി ഇക്കാര്യമെല്ലാം ചര്‍ച്ച ചെയ്ത ശേഷമാകും തെരഞ്ഞെടുപ്പ് തീയതി തീരുമാനിക്കുകയെന്നും ഇലക്ഷന്‍ കമ്മീഷന് അറിയിച്ചു.
കോവിഡ് മഹാമാരിയുടെ പശ്ചാത്തലത്തില്‍ പഞ്ചായത്ത് തെരഞ്ഞെടുപ്പ് നീട്ടിവെക്കണമെന്ന് ആവശ്യപ്പെട്ട് മലപ്പുറം സ്വദേശി ലത്തീഫ് നല്‍കിയ ഹര്‍ജി പരിഗണിക്കുമ്പോഴാണ് സംസ്ഥാന തെരഞ്ഞെടുപ്പ് കമ്മീഷന് നിലപാട് വ്യക്തമാക്കിയത്. സംസ്ഥാനത്ത് ഒരുലക്ഷത്തിന് അടുത്ത് കോവിഡ് രോഗികളാണുള്ളത്. അതുകൊണ്ടുതന്നെ ഇപ്പോള്‍ തെരഞ്ഞെടുപ്പ് നടത്തുന്നത് വലിയ ദുരന്തമായി മാറുമെന്നും ഹര്‍ജിക്കാരന്‍ പറഞ്ഞിരുന്നു.
ഈ ഹര്‍ജിയിലാണ് കമ്മീഷന് സത്യവാങ്മൂലം സമര്‍പ്പിച്ചത്. തെരഞ്ഞെടുപ്പ് നോട്ടിഫിക്കേഷനോ, തീയതിയോ ഒന്നും പുറപ്പെടുവിച്ചിട്ടില്ല. തെരഞ്ഞെടുപ്പ് സംബന്ധിച്ച് കമ്മീഷന് അന്തിമ തീരുമാനം പോലും കൈക്കൊണ്ടിട്ടില്ല. എപ്പോള്‍, എങ്ങനെ തെരഞ്ഞെടുപ്പ് നടത്തണം എന്നതുസംബന്ധിച്ച് വിശദമായ ചര്‍ച്ചകള്‍ക്ക് ശേഷം മാത്രമേ തീരുമാനമെടുക്കൂ എന്നും ഇലക്ഷന്‍ കമ്മീഷന് കോടതിയെ അറിയിച്ചു.
കോവിഡിനെക്കുറിച്ച് കമ്മീഷന് വ്യക്തമായ ബോധ്യമുണ്ട്. അതേസമയം തെരഞ്ഞെടുപ്പിന് സജ്ജമായിരിക്കാന്‍ തെരഞ്ഞെടുപ്പ് കമ്മീഷന് ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ടെന്നും കമ്മീഷന് വ്യക്തമാക്കി. നവംബര്‍ മാസത്തോടെ സംസ്ഥാനത്ത് തദ്ദേശസ്ഥാപനങ്ങളില്‍ പുതിയ ഭരണസമിതി നിലവില്‍ വരേണ്ടതാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
