കൊച്ചി: നിയമസഭ തെരഞ്ഞെടുപ്പില്‍ കളമശേരി മണ്ഡലത്തില്‍ പാര്‍ട്ടി സ്ഥാനാര്‍ഥിയായി പ്രഖ്യാപിച്ച അഡ്വ. വി ഇ ഗഫൂറിന് വേണ്ടി വോട്ട് അഭ്യര്‍ത്ഥിച്ച് പിതാവും മുസ്ലീം ലീഗ് മുതിര്‍ന്ന നേതാവുമായ വി കെ ഇബ്രാഹിംകുഞ്ഞ്. ജനങ്ങള്‍ക്ക് വിധേയനായി പ്രവര്‍ത്തിച്ച തന്റെ പാത മകനും പിന്തുടരണമെന്ന് ഇബ്രാഹിംകുഞ്ഞ് അഭ്യര്‍ത്ഥിച്ചു. ലീഗ് സ്ഥാനാര്‍ത്ഥി പ്രഖ്യാപനത്തിന് ശേഷം മാധ്യമങ്ങളെ കാണുകയായിരുന്നു ഇബ്രാഹിം കുഞ്ഞ്.
മകന് എന്ന നിലയിലല്ല വി ഇ ഗഫൂര്‍ സ്ഥാനാര്‍ത്ഥി പട്ടികയില്‍ ഇടംപിടിച്ചത്. മുസ്ലീംലീഗ് ജില്ലാ ജനറല്‍ സെക്രട്ടറിയാണ് വി ഇ ഗഫൂര്‍. ഹൈക്കോടതിയിലെ അഭിഭാഷകനാണ്. കേന്ദ്രസര്‍ക്കാരിന്റെ അഭിഭാഷകനായി പ്രവര്‍ത്തിച്ചിട്ടുണ്ട്. മറ്റുള്ളവരെ പോലെ തെരഞ്ഞെടുപ്പില്‍ വിജയിക്കുമെന്ന് കരുതുന്ന മകന് ജനങ്ങള്‍ക്ക് വിധേയനായി പ്രവര്‍ത്തിക്കണമെന്നും ഇബ്രാഹിംകുഞ്ഞ് ആവശ്യപ്പെട്ടു.
'ഞാന്‍ ഒരു തവണ മാത്രമേ ജനങ്ങളെ തേടി പോയിട്ടുള്ളു. പിന്നീട് ജനങ്ങള്‍ എന്നെ തേടി വരികയായിരുന്നു. അതുപോലെ ജനങ്ങളുടെ സേവകനായി മാറണം.ആ പാത മകനും പിന്തുടരണം'- മകന് എല്ലാവിധ പിന്തുണയും നല്‍കണമെന്നും ഇബ്രാഹിംകുഞ്ഞ് അഭ്യര്‍ത്ഥിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
